ADIF avqustun ortalarına kimi RoyalBank əmanətçilərinə kompensasiya ödənişini başa çatdıracaq

Əmanətlərin Sığortalanması Fondu 14 gün ərzində Royalbank əmanətçilərinə kompensasiya ödənişini başa çatdıracaq. Bu barədə Fondun icraçı direktoru Azad Cavadov bu gün mətbuat konfransında bildirib. 

Avqustun 1-dən başlayaraq üç bankın filialları vasitəsilə 6572 əmanətçiyə 17,34 mln manat ödəniləcək. Muğanbank 3004 əmanətçiyə 8,02 mln manat, AGBank 6,56 mln manat (2658 müştəri) və Bank Respublika 2,76 mln manat (910 əmanətçi) ödəyəcək. Ödəniş prosesinə 27 filialın 60 əməliyyatçısı qoşulub, deyə Cavadov bildirib.

Fondun rəhbəri bir əmanət üzrə maksimal həcmin artırılmasını zəruri saymır. Bu gün həmin məbləğ MDB-də ən yüksəkdir. Amma o, gələcəkdə sığorta olunan əmanətlər üzrə faiz həddinin indiki 12 faizdən artacağını istisna etmir. 

AM B 12 iyulda "Royalbank"ın lisenziyasını ləğv edib və bunu məcmu kapitalın minimal məbləği və adekvatlığı tələblərinə əməl edilməməsi, kreditorları qarşısında öhdəliklərini icra edə bilməməsi, idarəetməni və cari fəaliyyəti etibarlı və prudensial qaydada həyata keçirməməsi,  eləcə də Mərkəzi Bankın verdiyi yazılı göstərişlərini yerinə yetirməməsi ilə əsaslandırıb. 

Fond 2007-ci ilin avqustundan fəaliyyət göstərir. Ölkədəki 43 bankdan 42-i onun üzvüdür. Hazırda onun sığorta ehtiyatları 48 mln manatdır. Bir əmanət üçün maksimal kompensasiya həcmi 30 min manatdır. 1 iyun 2010-cu ildən Fond illik faiz dərəcəsi 12%-dən çox olan əmanətləri sığortalamır. --15С--