AİC ASC daha bir layihədən çıxıb

“Azərbaycan İnvestisiya Şirkəti” (AİC) ASC  “Agstafa Aqroservis”MMC payçıları strukturunu tərk edib.  Şirkətdə 25% payın satışı üzrə sövdələşmənin nə zaman və hansı formada baş verdiyi açıqlanmır.

Səhmdar cəmiyyətinin yenilənmiş saytında  (www.aic.az) yalnız bu sövdələşmənin ili qeyd olunur. İştirak payının kimə satılması və tərəflərin neçəyə razılaşmaları da gizli saxlanılır.

Qeyd edək ki,  Ağstafa rayonunda Almaniyanın RAO Global Group GmbH (75%) şirkətilə aqtotexniki xidmətlər üzrə müəssisənin yaradılması layihəsi 2012-ci ildə başa çatıb. Müəssisəyə investisiyalar $5,934,000 təşkil edib. AİC-nin kapital qoyuluşları $361,000 həcmində qiymətləndirilib.

AİC-in investisiya qoyduğu layihələrdən çıxmaq strategiyasına görə, şirkət öz səhmlərini birjada açıq təklif metodu ilə strateji tərəfdaşa və ya fəaliyyət göstərən digər səhmdara sata bilər.

Xatırladaq ki, 2012-ci ilin sonlarında AİC iki layihədə - Səngəçal neft-qaz terminalında və Masazır duz zavodunda 25% iştirak payını “Azersun Holding” MMC-yə satıb.

2007-ci ildə  AİC Səngəçal neft-qaz terminalı QSC-də və “Azərbaycan Duz İstehsalat Birliyi” QSC-də 25% səhm əldə edib. Şirkətin korporativ broşürasına görə, AİC tərəfindən bu müəssisələrə investisiyalar $9 mln. və ya  $2,196,000 mln. təşkil edib.

ОАО AİC 2006-cı ilin martında yaradılıb. Nizamnamə kapitalı 160 mln. manat təşkil edir. Şirkətin yaradılmasında məqsəd qeyri-neft sektorunun inkişafına yardım göstərməkdir. Hazırda şirkətin investisyaları aşağıdakı kimi bölünüb:

“Holcim (Azerbaycan)” ASC  - 14,718,000 avro;

“Saba”  ASC – $14, 475,000;

“Milk Pro” ASC - $5,375,000;

“Azerbaijan Shipyard Company” ASC – $40 mln.;

“Xəzər Beynəlxalq Əməliyyat Şirkəti” ASC -  $9,230,000;

“Azertokhum” MMC – $4,196,000.  08B