ARDNŞ beynəlxalq antikorrupsiya standartı tətbiq edir

Hazırda Dövlət Neft Şirkətində (ARDNŞ) beynəlxalq antikorrupsiya standartlarının tətbiqi üzrə iş aparılır, deyə ARDNŞ-nin iqtisadi məsələlər üzrə vitse-prezidenti Süleyman Qasımov 22 iyunda Bakıda Xəzər-Avropa İnteqrasiya İşgüzar Klubunun (CEIBC) üzvlərinin görüşü zamanı bildirib.

Onun sözlərinə görə, artıq müvafiq tender keçirilib, qalib müəyyən edilib. Amma onun adını çəkmək tezdir. Çünki tender proseduru bir sıra hüquqi məsələlərin həllini tələb edir. Bu istiqamətdə iş ayın sonunda tam başa çatdırılacaq. 

Əvvəllər Qasımov Turan-ın müxbiri ilə söhbətində izah etmişdi ki, bu standartlar tətbiq ediləndən sonra ARDNŞ sistemində material və avadanlıq alışı daha şəffaf olacaq və qurumun tərkibinə daxil olan 22 strukturun hamısı ona əməl edəcək. 

Digər tərəfdən, ARDNŞ hər gün beynəlxalq arenada əlaqə dairəsini genişləndirir: o, öz reytinqini, iqtisadi göstəricilərini artırmalı, ölkə daxilində və xaricdə iri kapital tutumlu layihələrin icrası üçün daha yumşaq şərtlərlə kredit götürməlidir. Bunların hamısı üçün islahatlar gərəkdir. 

Son illər görülən işlərin arasında Qasımov daha vacibi kimi ARDNŞ-nin maliyyə hesabatlılığının beynəlxalq standartlarına keçidi göstərib. Gələcəkdə bu sistem avtomatlaşdırılacaq. Avtomatlaşdırılmış idarəetmə və uçot sistemləri müxtəlif istiqamətlərdə, o cümlədən kadr resursu, alqı-satqı, risklərin qiymətləndirilməsi, istehsal proseslərinin planlaşdırılmasında tətbiq edilib. 

Vitse-prezident həmçinin qeyd edib ki, avtomatlaşdırılmış sistem sayəsində, məsələn, üç gün ərzində ARDNŞ-nin 73 min əməkdaşının maaşı onların plastik kartına köçürülür. 

* ARDNŞ artıq neçə ildir ki, təkcə Azərbaycanda yox, Gürcüstanda da ən iri vergi ödəyicisidir. Şirkətin proqnozuna əsasən, 2018-ci ildə şirkət  Türkiyə ərazisində dövriyyəyə görə üçüncü olacaq. Hazırda ARDNŞ ölkədən xaricdə 13 təmsilçiliyə malikdir. 

** 2011-ci ildə ARDNŞ-nin xalis mənfəəti 879 mln manat ($1 mlrd 118 mln) olub. --12В—