ARDNŞ Yunanıstanın TAP layihəsinə qoşulma şərtlərini açıqladı

Dövlət Neft Şirkəti Transadriatik qaz kəməri layihəsində payının bir hissəsini Yunanıstana güzəştə getməyə hazırdır. Bu barədə jurnalistlərə ARDNŞ-nin investisiya və marketinq üzrə vitse-prezidenti Elşad Nəsirov bildirib.

Onun sözlərinə görə, ARDNŞ bu təklif üçün açıqdır. «Əgər Yunanıstan pay almaq istəyirsə, buna hazırıq. Yunanıstan tərəfinə əsas tələb vaxtında ödəniş etməkdir», - deyə Nəsirov bildirib.

«Əgər Yunanıstan tərəfi TAP səhmdarı kimi çıxış edəcək şirkət tapsa, ARDNŞ payının bir hissəsini güzəştə gedə bilər ki, kəmər indikindən daha çox Yunanıstanın olsun. Amma kəmərin tikintisi və Cənubi Qafqaz dəhlizi gecikməsin deyə yetərincə ödəniş qabiliyyətli şirkət tapmaq lazımdır», - deyə Nəsirov bildirib.

Nəsirov deyib ki, Azərbaycan tərəfi Yunanıstanla daimi təmasdadır. «Bu ölkənin yeni hökuməti, nazirlikləri, şirkətləri ilə təmaslarımız var. Yunanıstanın bu layihə vasitəsilə daha intensiv inkişafı üçün hansısa töhfə verməsi imkanı olsa, bundan istifadə edəcəyik», - deyə o bildirib.

Qeyd edək ki, fevralın 12-də Yunanıstanın energetika naziri Panayotis Lafazanis "Cənub qaz dəhlizi" Məşvərət Şurasının iclasında iştirak etmişdi. Yunanıstanın bir sıra KİV-i məlumat vermişdi ki, Afina TAP kəmərində pay almaq, Yunanıstan ərazisindən tranzit tariflərini artırmaq və “Şahdəniz 2” qazının qiymətini azaltmaq istəyir.

* TAP səhmdarları bunlardır:  BP (20%), ARDNŞ (20%), Statoil (20%), Fluxys (16%), Total (10%), E.ON (9%) və Axpo-dur (5%).—12С--