Asiya İnkişaf Bankından daha $200 mln

Asiya İnkişaf Bankı Masallı-Astara yolunun 39 km-lik hissəsinin tikintisi üçün $200 mln ayırır, deyə AİB-in Bakı ofisi məlumat verir. 

Bu barədə sazişi nəqliyyat naziri Ziya Məmmədov, AİB tərəfindən isə Azərbaycan nümayəndəliyinin rəhbəri Olli Noroyono imzalayıblar.

Bu, $500 mln məbləğində investisiya layihəsi üzrə üçüncü tranşdır. Bankın press-relizində deyilir ki, «AİB Masallı-Astara avtomobil yolunun dövlət üçün vacib olduğunu anlayır. Bu yol ölkənin əsas Şimal-Cənub magistral yolunun tərkib hissəsi olaraq cənub sərhədləri ilə paytaxtı birləşdirir. Yolun pis vəziyyətdə olması yüksək nəqliyyat xərcləri, çatdırmanın daha çox vaxt aparması və yol-nəqliyyat hadisələri ilə nəticələnir. Eyni zamanda, regional ticarətin inkişafına təsir edir», - deyə O.Noroyono bildirib.

Kredit 24 illiyə 4 illik güzəşt müddəti ilə verilir. Azərbaycan 1999-cu ildən AİB-in üzvüdür. Bu ilin əvvəli üçün Azərbaycan hökuməti AİB-lə energetika, su təchizatı, irriqasiya və aqrar-sənaye kompleksi üzrə 7 layihəni həyata keçirmək üçün $596,9 mln-luq kredit sazişi imzalayıb. 

AİB-in 2011-2013-cü illərdə Azərbaycan üzrə biznes-planına əsasən, bank ölkəyə $1 mlrd kredit verməyi planlaşdırır. --17D—