Şotland faunreyzinqi

Dörd gənc xərçəngə qarşı mübarizə üçün ianə toplamaq məqsədilə maşına minib Londondan Monqolustana yola düşdülər. Onlar bir ölkədən başqa ölkəyə gedir, hər gün öz aksiyalarını veb səhifələrində işıqlandırır və oxucuları pul verməyə çağırırlar. 

Azərbaycanda belə bir şey təsəvvür etmək olar? Bu düşüncə ilə ötən həftənin sonlarında Monqolustana gedərkən yolüstü Bakıya gələn həmin gənclərin görüşünə getdim. 

“Biz Şotlandiyanın Aberdin şəhərində ailə məktəblərin 4 məzunu maşınla Britaniyadan Monqolustana gedirik. Yolumuz Fransa, Belçika, Hollandiya, Almaniya, Polşa, Ukrayna, Rusiya, Qara Dəniz, Gürcüstan, Azərbaycan, Xəzər, Türkmənistan, Özbəkistan, Qırğızıstan, yenə Rusiyadan keçir və Monqolustana gedir. Bütün yol 6 həftə sürür”, deyən dördlükdən biri – Luis Hyuston adlı kürən oğlan məmnuniyyətlə qeyd edir ki, artıq doğma şəhərlərində xərçəng xəstələrinə dəstək üçün 11,5 min funt toplanıb.

Pulun necə toplandığı haqda suala cavabda dördlüyün digər üzvü – Conatan Findlam deyir ki, bu, çox asandır. Xüsusi veb səhifə var (www.friengineers.com), istənilən şəxs o səhifəyə daxil olub aksiyanın gedişi ilə tanış ola bilər. Dəstək olmaq istəyən müəyyən hesaba istənilən məbləği yatıra bilər.

Faundreyzinqlə (sözbəsöz tərcüməsi – pul toplamaq) məşğul olanların vəzifəsi ictimaiyyətdə, potensial donorlarda etimad yaratmaqdır ki, onlar bu ideyanın və onun təşəbbüskarlarının ciddiliyinə inansınlar, deyir şotland dördlüyünün üçüncü iştirakçısı – Freyzer Qalbrayt.

- Biz pula toxunmuruq və onu hesabdan çəkə bilmirik. Biz yalnız insanları xərçəng xəstələrinə kömək etməyə çağırırıq, puldan isə xəstələri müalicə edənlər istifadə edəcək.

- Pulu necə toplayırsınız? İnsanları necə cəlb edirsiniz?

- Biz müxtəlif metodlardan istifadə edirik, məsələn, ənənəvi şotland rəqsi mərasimi. Mərasim zamanı bütün arzu edənləri bu kiçik bayrama dəvət edirik, rəqs edirik, yemək-içmək paylayırıq və bütün gələnlər xeyriyyə məqsədilə ianə verə bilir.

Bundan başqa, müxtəlif şotland icmalarının nümayəndələri saytda öz emblemlərini yerləşdirə və öz tərəfdarlarını və üzvlərini xeyriyyə məqsədilə fəal şəkildə ianə verməyə çağıra bilərlər.

Pul toplanması zamanı əsas vəzifəmiz pablisit və ictimaiyyətin məlumatlandırılmasından ibarətdir. Mətbuatın bütün prosesi işıqlandırması zəruridir, deyə kvartetin sonuncu iştirakçısı – Qreyq Morrison əlavə edir. Belə ki, iki həftə ərzində artın 2500 nəfər hesaba pul köçürüb.

- Sizin üçün bu ideyanın mənası nədir?

- Şotlandiyada və bütünlükdə Böyük Britaniyada gənclər üçün bu, ictimai həyatın mühüm hissəsidir. Cəmiyyət öz üzvlərinə göstərir ki, biz hamımız bir ailəyik, insanlar təkcə özlərini deyil, yaxınlarını və hətta tanımadıqları insanları belə düşünməlidir, deyə Luis cavab verir.

Biz bu işi öz CV-lərimizdə qeyd edirik və bütün bunlar işə qəbul və xidməti pillələrin yüksəlməsi zamanı nəzərə alınır. Baxmayaraq ki, bu fəaliyyət sırf könüllü işdir, deyə o qeyd edir.

- Vəsait bağışlayanların yaş həddini izləmək imkanı var?

- Prinsipcə var, bizdə olan məlumata görə, ən çox 25-30 yaşlı insanlar vəsait yatırıblar.

- Gənclər maşınla dünyanın o biri başına getməkdən qorxmurlar?

- Bu, səyahətdir. Biz qorxmuruq, hamımız növbə ilə maşını sürürük, o bizi başaşağı etmir, baxmayaraq ki, cəmi 1,2 litrlik motoru olan kiçik maşındır. Amma bu, bizə yetər. Səmimi insanlarla qarşılaşırıq, Gürcüstandan xüsusilə çox xoşumuz gəldi – yaxşı yeməkləri və çaxırları var (gülürlər).

Şotland dördlüyü Bakıdan Türkmənistana, oradan da Monqolustana yola düşdü. Onlar bir ay sonra Monqolustanda olmalıdırlar.

Faydalı və xoşagələni bir araya gətirən, xəstə insanlara dəstək naminə ictimai fəallığın yüksək əhəmiyyətini dərk edən bu gəncləri görmək çox xoş idi.

Onlara baxarkən Azərbaycan və Şotlandiya cəmiyyətlərinin maraqları arasında böyük uçurum hiss olunur. Ona görə yox ki, bizdə xeyriyyə üçün pul istəyən və toplayan insanlar azdır. Söhbət şəxsi vətəndaş məsuliyyətini dərk edən sıravi vətəndaşların belə tədbirlərə münasibətindən və fəallığından gedir.