Ayda min manatdan çox alanların sayı artır

Dövlətstatkom aylıq əmək haqqı 1700 manata qədər və daha çox olanlar barədə son məlumatları açıqlayıb. Hesabata görə, onların 3,8%-i ayda 1000 manatdan çox qazanır. 

Məlumatlar 2012-ci ilin noyabrına aiddir və o vaxtdan xeyli dəyişiklik olub. «1,3% işçi ayda 1700 manatdan çox alır. İllik hesablamada onlar 0,3% artıb. 1000 manat və daha çox alanlar 3,8%-dir. Bu, 2011-ci ilin noyabrından 0,6% çoxdur. 

Muzdluların 1,7%-i minimal maaş (93,5 manat) qədər alır. İşəgötürənlər onların maaşını 1% artırıb. 

Muzdla işləyənlərin üçdə biri 2012-ci ilin noyabrında 93,5-150 manat alıb. İşləyənlərin 52%-i 300 manata qədər maaş alıb. Bu, 2011-ci ilin noyabrından 19% azdır. 24% muzdlu 301-dən 700 manata qədər maş alıb. Bu, 2011-ci ilin noyabrındakı (22,6%) qədərdir.

İşləyənlərin 6,3%-i ipoteka ilə ev ala bilər. Onlar 701-1700 manat maaş alır. 2011-ci ildə bu göstərici 5,3% idi. 

Hasilat sənayesində 29,7% 500 manata qədər əmək haqqı alır. Bu, bir il öncəkindən 3,1% azdır. Bu sektorda işçilərin üçdə biri ayda 501-1000 manat maaş alır. 2011-ci ilin noyabrında hasilat şirkətlərində işçilərin 13,9%-i 1700 manatdan çox alıb. Ötən ilin noyabrında bu göstərici 17,5%-ə çatıb.

Maliyyə şirkətlərində əməkdaşların 47,3%-i 500 manata qədər maaş alır. Personalın üçdə biri (34,4%) ayda 501-1000 manat qazanır. Bank və sığorta şirkətlərinin rəhbər heyəti (10,5%) ayda 1700 manatdan çox maaş alır. 

2012-ci ilin noyabrında 150 manata qədər maaş alanlar hamıdan çox olub - 34,3%. Kənd təsərrüfatı müəssisələrində bu göstərici 64,2%, daşınmaz əmlakla əməliyyat kçeirənlərdə 52,8%, səhiyyə və sosial xidmətlərdə 59%, istirahət, əyləncə və incəsənətdə 48,3%,  ticarət və avtotəmirdə 44,4%-dir. 

Təhsil işçilərinin 4 faizi 2012-ci ilin noyabrında 93,5 manat alıb. Müəllimlərin 36,5%-i 150 manat qazanıb. 52,5%-in maaşı 500 manata qədər olub. Rəsmi olaraq 1000 manatdan çox alan müəllim yoxdur. 

2012-ci ilin noyabrında Azərbaycanda muzdlu işçilərin sayı 1,4 mln nəfər olub. --08B—