BMT-nin qadınlara qarşı zorakılıq üzrə xüsusi məruzəçisi Bakıya gəlir

BMT-nin xüsusi məruzəçisi xanım Raşida Mancu ölkədə qadınlara qarşı zorakılıq məsələsini tədqiq etmək üçün 25 noyabr – 5 dekabr tarixlərində Azərbaycana səfər edəcək.

Bu barədə Turana  BMT-nin Bakıdakı nümayəndəliyindən bildiriblər.

Məlumata görə bu, dünyada BMT İnsan Hüquqları Şurası tərəfindən təyin edilmiş müstəqil ekspertin qadınlara qarşı zorakılıq hallarını müşahidə etməklə hesabat vermək məqsədilə Azərbaycana etdiyi birinci səfəridir. 

“Qadınlara qarşı zorakılıq bütün dünyada insan hüquqlarının ən çox yayılmış pozulması hallarından biridir və  bu qadınların əsas hüquq və azadlıqlarından tam şəkildə yararlanmasına ciddi maneçilik törədir,” xanım Mancu bildirib.

O ,bildirib ki, missiya müddətində ölkədə mövcud olan bu vəziyyətin qiymətləndirilməsi məqsədilə qadınlara qarşı zorakılığa qarşı mübarizədə iştirak edən milli maraqlı tərəflərlə görüşlər keçirəcək.

On gün davam edəcək səfər müddətində xanım Mancu Bakı, Xaçmaz, Gəncə, Lənkəran və Sumqayıt şəhərlərində Hökumət nümayəndələri ilə görüşəcəkdir. O, həmçinin vətəndaş cəmiyyəti və xidmət təminatçılarının təmsilçiləri ilə də bir araya gələcək.

“Mən xüsusilə, gender əsaslı zorakılığın ayrı-ayrı qurbanları ilə üzbəüz görüşmək üçün sığınacaqlara və qadın həbsxanasına baş çəkəcəyəm.” xanım Mancu deyib.

Bununla belə,dekabrın 5-də xüsusi məruzəçi səfərin ilkin nəticələrinini ictimaiyyətə açıqlamaq üçün  mətbuat konfransı keçirəcək.

Xanım Mancu İnsan Hüquqları Şurasının qarşıdan gələn sessiyasına missiya zamanı əldə ediləcək məlumatlar əsasında yekun nəticələr və tövsiyələrdən ibarət hesabat təqdim edəcək.

* Xanım Rashida Manjoo (Cənubi Afrika) 2009-cu ilin iyun ayında BMT-nin İnsan Hüquqları Şurası tərəfindən qadınlara qarşı zorakılıq, onun səbəb və nəticələri üzrə Xüsusi Məruzəçi təyin edilib.-0-