«Azəravtoyol» dövlətdən uzunmüddətli kredit götürüb

“Azəravtoyol” ASC 2015-ci ildəki fəaliyyəti barədə KİV-də geniş hesabat açıqlayıb. Sənəddə bir sıra cavabsız suallar meydana çıxır.

2015-ci ildə Nazirlər Kabinetinin 15 iyul tarixli sərəncamı ilə Maliyyə Nazirliyinin zəmanət ilə “Azəravtoyol” ASC-yə uzun müddətə (10 il) illki 1%-lə 249 mln manat kredit ayrılıb. 31 dekabr 2015-ci il tarixinə şirkətin uzunmüddətli borclarının həcmi 609,4 mln manatı keçib. Hökumətin bu qərarı barədə məlumat ilk dəfə açıqlanır.

Ötən il şirkət 52 mln manat qısamüddətli bank kreditlərindən də istifadə edib. Bu ilin əvvəli üçün qısamüddətli kreditlərin həcmi 5 mln manata çatır. 

2015-ci ildə “Azəravtoyol” ASC avtomobil yollarının istismarı, tikintisi və təmiri üzrə 372,3 mln manatlıq (ƏDV nəzərə alınmaqla) iş görüb. Xərclərin əsas hissəsi (169,7 mln manat və ya 47,9%) yolların tikinti və təmiri üzrə materialların payına düşür.

2015-ci ildə şirkətdə siyahı üzrə 11 min nəfər çalışıb. Onların əmək haqqı fondu 34 mln manat təşkil edib.

2016-cı ilin əvvəli üçün “Azəravtoyol” ASC-nin əsas vəsaitlərinin balans qiyməti 695 mln manat olub, köhnəlmə 264,7 mln manat qiymətləndirilir.

Başa çatmamış kapital qoyuluşu üzrə göstəricilər də az maraqlı deyil. 2016-cı il yanvarın 1-i üçün onların həcmi 6 mlrd 667 mln manat olub. İl ərzində onların həcmi 446 mln manat artıb. Bundan əlavə, ASC-nin 137 mln manatlıq quraşdırılmalı avadanlığı var. Ehtimal ki, tikilən və istismara verilən yol-nəqliyyat obyektlərinin çoxu indiyədək dövlət komsiiyası tərəfindən qəbul edilməyib.

ƏDV daxil dövlət büdcəsinə 23 mln manat ödənilib. 2015-ci ildə “Azəravtoyol” 156,4 min manat mənfəət əldə edib.  08D