Azərbaycan ÜTT ilə danışıqlarda baund-tarifləri azaldacaqmı?

Azərbaycanın Ümumdünya Ticarət Təşkilatı üzrə potensial tərəfdaşları sənaye və kənd təsərrüfatı mallarına yeni tariflər gözləyir, deyə XİN rəhbərinin müavini Mahmud Məmmədquliyev jurnalistlərə bildirib. Onun sözlərinə görə, bu məsələdə ABŞ, Aİ və Norveç daha çox aktivlik göstərir.

Ölkə başçısı dəfələrlə deyib ki, ÜTT ilə danışıqlarda hökumətin vəzifəsi yerli biznesi qorumaqdır. Azərbaycan ÜTT-yə üzvlük prosesində  baund-tariflərin orta dərəcəsini 13,2%, son tariflərin orta dərəcəsini 11,7% təklif edib.

Aqrar sənaye kompleksinin tariflərinin orta dərəcəsi 14,1% təklif edilib, inkişaf etmiş ölkələrdə bu göstərici 22,8%, inkişaf etməkdə olan ölkələrdə 12,7%-dir. Ölkədə orta gömrük tarifi 9,4%, inkişaf etmiş ölkələrdə bu göstərici 9,6%,  inkişaf etməkdə olan ölkələrdə 17,7%-dir.

Baund-tarif müəyyən malın idxalında mükasimal gömrük rüsumu dərəcəsidir.

Azərbaycan 1997-ci ildən ÜTT-də müşahidəçidir. Hökumət ÜTT üzvləri ilə 2004-cü ildə danışıqlara başlayıb. Hazırda 19 ölkə ilə danışıqlar aparılır.

Türkiyə, Oman, BƏƏ, Gürcüstan, Qırğızıstanla danışıqlar aparılıb və protokollar imzalanıb. Çin və Moldova ilə protokollar imzalanma ərəfəsindədir. --17D—