Azərbaycan və İsrailin əməkdaşlığı genişləndirəcəyi iqtisadi sahələri açıqlanıb

Bakı/18.03.21/Turan: Azərbaycan İqtisadiyyat Nazirliyinin məlumatına görə, martın 17-də videokonfrans formatda İsrail-Azərbaycan Ticarət və Sənaye Palatasının illik iclası keçirilib, iclasda ikitərəfli iqtisadi əməkdaşlığı gələcəkdə daha da dərinləşdirmək planları təsvir edilib.

Biznes nümayəndələrinin də iştirak etdiyi tədbirdə çıxış edən İsrail-Azərbaycan Ticarət və Sənaye Palatasının prezidenti Aleks Kaplun Palatanın ötənilki fəaliyyəti, İsrail dövləti və Azərbaycan Respublikası arasında ticarət, humanitar və digər sahələrdə əlaqələrin inkişafına yönəlik tədbirləri, bu ilə dair planları barədə məlumat verib.

Azərbaycan Respublikası Hökuməti ilə İsrail Dövləti Hökuməti arasında Birgə Komissiyanın həmsədri, iqtisadiyyat naziri Mikayıl Cabbarov Palatanın fəaliyyətini yüksək qiymətləndirib.

İqtisadiyyat Nazirliyinin məlumatında qeyd edilir ki, nazir azad edilmiş ərazilərimizin bərpası prosesində əməkdaşlıq, postpandemiya dövründə aparılacaq iqtisadi islahatların istiqamətləri barədə fikirlərini bölüşüb.

İsrail tərəfindən qeyd olunub ki, bu ölkənin şirkətləri informasiya texnologiyaları, kənd təsərrüfatı, su sektorunun idarəedilməsi və səhiyyə sahələrinə böyük maraq göstərir. “Bu sahələrdə əməkdaşlıq üçün böyük potensial var və hər iki ölkənin dövlət-biznes səviyyəsində danışıqlar aparılır”.

Tədbirdə İsrailin Azərbaycandakı səfiri Corc Dik çıxış edərək İsrail-Azərbaycan Ticarət və Sənaye Palatasının ikitəəfli əməkdaşlığın dərinləşdirilməsinə mühüm töhfə verdiyini qeyd edib.

İsrail Xarici İşlər Nazirliyinin Asiya və MDB ölkələri ilə iqtisadi əməkdaşlıq departamentinin direktoru Mixail Lotem “İsrail-Azərbaycan iqtisadi münasibətləri və postpandemiya dövründə yeni imkanlar” mövzusunda təqdimatla çıxış edib.

Dövlət Gömrük Komitəsinin məlumatına görə, 2020-ci ildə Azərbaycan İsraildən 28,2 milyon manatlıq mal alıb, bu da əvvəlki ildən 35,4% azdır. Azərbaycanın İsrailə ixracı 437,5 milyon dollar (-67,1%) həcmində qiymətləndirilir. 08D