Azərbaycanda bərpa olunan enerji mənbələri və dünya təcrübəsi

ADA Universitetində “Enerji, bərpa olunan mənbələr və dayanıqlılıq” mövzusunda konfrans keçirilib. Yer kürəsi gününə həsr olunmuş 7-ci illik konfransa ABŞ-ın Azərbaycandakı  səfirliyi  sponsorluq edib. Konfrans AmCHam, ADA Universiteti, Alternativ və Bərpa Olunan Enerji Mənbələri üzrə Dövlət Agentliyi, Amerika Məzunlarının Avropa Şəbəkəsi Assosiasiyası və ABŞ Təhsilli Azərbaycan məzunları tərəfindən təşkil edilib. 

Konfransda ekoloji cəhətdən təmiz iqtisadiyyata keçid ətraf mühitin təmizlənməsi ilə bağlı  qanunvericilik və  qanunların tələblərinə əməl edilməsi, ekoloji cəhətdən təmiz metodlarla əldə  edilən enerjinin təşviqi və  bu sahədə maarifləndirməyə  həsr olunmuş çıxışlar dinlənilib. Forumda həmçinin bərpa olunan enerji sahəsində  uğurlu tədqiqatlar aparmış və  müvəffəqiyyət qazanmış ölkələrin təcrübəsindən danışılıb.   

“Bərpa olunan enerji hər zaman Azərbaycan iqtisadiyyatı üçün önəmli olmalıdır. Bu məsələ  hazırda ABŞ-da aktualdır və Azərbaycan da bu ölkənin təcrübəsindən istifadə etməlidir”, - ADA Universitetinin rektoru Hafiz Paşayev qeyd edib.

Alternativ və Bərpa Olunan Enerji Mənbələri üzrə Dövlət Agentliyinin sədri Akim Bədəlov deyib ki, ölkədəki siyasi-iqtisadi durum və siyasi iradə bu sahənin inkişafına təkan verir.

“Hazırda üç istiqamətdə layihələr reallaşdırırıq. Onlardan biri də “bir ev-bir stansiya” layihəsidir. Analoji stansiyalar 19 müəssisə və evdə tətbiq edilir. Biz ABŞ-ın Enerji Agentliyi ilə də əməkdaşlıq edirik. Bu gün biz Amerika texnologiyalarını Azərbaycana gətirmək, həmçinin, bununla ucuz kreditləri Azərbaycana gətirmək istəyirik”, - o qeyd edib.

A.Bədəlov “Amerikanın səsi”nin sualının cavabında deyib ki, Bakıda Pirallahı elektrik stansiyası dəniz üsulu ilə həyata keçirilsə dəyəri 1 mlrd. dollar olacaq. Amma hazırda tətbiq edəcəyimiz üsulla bu layihə 450 mln. dollara başa gələcək. Məqsədimiz dövlət xərclərini azaltmaqdır. Ona görə investisiya şirkətlərini cəlb edirik. Çin və başqa ölkələrin şirkətləri buna maraq göstərir”.

Onun sözlərinə  görə, Azərbaycanda alternativ və bərpa olunan enerji mənbələri üzrə ikinci Dövlət Proqramı hazırlanır. 

A.Bədəlov ABŞ-ın dəstəyindən də danışıb və qeyd edib ki, yaxın vaxtlarda ABŞ-ın İnkişaf Agentliyi (USAİD) ilə əməkdaşlığa dair sənəd imzalanacaq.

ABŞ-ın Azərbaycandakı səfiri Robert Sekuta bərpa olunan enerjiyə  sərmayə  qoymaq faydalıdır.

“Enerji istehsalı zamanı ətraf mühitə təsirləri nəzərə alınmalıdır. Hazırda qlobal enerjinin 30 faizi günəş və  külək vasitəsilə əldə  edilir. Son ildə alternativ enerji sahəsinə 350 milyard dollar vəsait cəlb edilib. Bu il yalnız günəş enerjisinə sərf olunan xərclər 20 faiz artıb”, R.Sekuta qeyd edib.  

“BP-Azerbaijan”ın vitse-prezidenti Bəxtiyar Aslanbəyli deyib ki, onun təmsil etdiyi şirkət ekoloji tarazlığın qorunmasına böyük əhəmiyyət verir.

“Enerji uzunmüddətli  biznes sahəsidir və  davamlı inkişafın əvəzolumaz hissəsidir. BP şirkəti daim deaktiv tullantıları azaltmağa çalışır. Biz alternativ enerji layihələrinə də  uzunmüddətli  perspektiv kimi baxırıq”, B. Aslanbəyli qeyd edib.

 Bərpa Olunan Enerji üzrə Amerika Şurasının vitse-prezidenti Tom Veyriç bildirib ki, Azərbaycan və ABŞ arasında bərpa olunan enerji mənbələri üzrə davamlı əməkdaşlıq hər iki ölkə üçün faydalı olacaq. 

"Bərpa olunan enerji sahəsinin inkişafında Azərbaycan və ABŞ arasındakı əməkdaşlığı alqışlayıram. ABŞ tərəfindən Azərbaycana bu istiqamətdə atılan addımlarda dəstəyi qeyd etmək istəyirəm. Bu istiqamətdə davamlı olan əməkdaşlıq hər iki dövlət üçün də faydalı olacaq".

O, bərpa olunan enerjinin əhəmiyyətindən danışarkən deyib ki, bu sahənin inkişafı digər istiqamətlərdə də imkanlar yaradır.

“Bu, həm də yeni nəsil üçün vacibdir. Azərbaycan bu sahədə qloballaşan dünyanın bir üzvünə çevrilməkdə davam edə bilər. Bu baxımdan da çoxsaylı imkanlar təqdim olunur”, - T.Veyriç qeyd edib. -03C-