Azərbaycanda ilk dəfə insayder əqdləri açıqlanıb

Bakı Fond Birjası sentyabrın 23-də ilk dəfə insayder əqdi barədə informasiya açıqlayıb. Qiymətli Kağızlar üzrə Dövlət Komitəsinin Qiymətli kağızlar bazarında sui-istifadələrin qarşısının alınmasına dair qaydaları 2012-ci ilin dekabrından qüvvədədir. Amma BFB onlarla insayder əqdləri olsa da, onlar haqda məlumat verməyə indi başlayıb. 

Bakının notarial kontorlarından biri 6 iyun 2013-cü ildə “AXA MBASK”ın səhmlərinin alqı-satqısı barədə Eldar Qəribovla “AXA Seguros Generales, S.A., De Seguros Y Reaseguros” (İspaniya Krallığı) şirkəti arasında əqdi qeydiyyata alıb. Bu əqdlər barədə informasiya BFB-yə 12 avqustda verilib. Deyilən qaydalara əsasən, insayder əqdi barədə informasiya QKDK-ya bir gün ərzində verilməlidir. İnsayder isə bu informasiyanı korporativ saytı və BFB vasitəsilə yaymalıdır. Beləliklə, informasiya çox gec yayılıb. 

Bu iki əqddən sonra Eldar Qəribovun “AXA MBASK”da payı 37,7%-dən  16,07%-ə (3675 səhm) düşüb. Yayda səhm paketi yerləşdirilənə qədər onun payı 49% idi. Əqdlər səhmlərin nominal qiyməti ilə satılıb – biri 382 manat. 

Bu əqdlərdən sonra “AXA MBASK”ASC-nin səhmlərinin 83,92%-i və ya 19185 ədədə səhm İspaniya şirkətinə məxsusdur. “AXA MBASK”. O, Azərbaycan sığorta şirkətinin kapitalına 2010-cu ildə daxil olub. “AXA Seguros Generales, S.A., De Seguros Y Reaseguros” Fransanın “AXA Group” şirkətinin törəməsidir. 

"AXA MBASK" 1992-ci ildə yaradılıb. Ödənilmiş nizamnamə fondu 8 mln 732,5 min manatdır. 2012-ci ildə şirkətin xalis mənfəəti 109 min manat olub. 08B