Azərbaycanın tətbiq etdiyi məhdudiyyət səbəbindən Gürcüstanın avtomobil bazarı çöküb

Tbilisi/06/06/14/Turan-BS PRESS:  Azərbaycanda 2005-ci ilə qədər istehsal tarixi olan  avtomobillərin idxalına qoyulan məhdudiyyət və Ermənistanda rüsumun artırılmasının gözlənilməsi gürcü avtodilerlərin biznesinə zərbə vurub. “Exo Kafkaza” radiostansiyası bildirib.

Azərbaycan 2014-cü il aprelin 1-dək yaşı 8 ili ötən avtomobillərin idxalına məhdudiyyət qoyub. Gürcüstandakı avtodilerləri Ermənistanın Gömrük İttifaqına daxil olması ilə əlaqədar avtomobil gətirilməsi üçün rüsumun artırılması da gözləyir.

“Azərbaycanın tətbiq etdiyi məhdudiyyətdən sonra biz bir maşın belə sata bilmirik. Bütün vəsaitini bu biznesə qoyan 20 mindən çox adamın və onların ailəsinin maraqları zərbə altına alınıb”, - avtodiler Mindiya Zakareişvili “Exo Kafkaza” bildirib.

Radiostansiyanın məlumatına görə,  son illər Azərbaycan Avropa və ABŞ-dan Gürcüstana gətirilən avtomobillərin əsas satış bazarı olub. Belə ki, 2013-cü ildə on minlərlə, bu il isə cəmi 2,5 min avtomobil gətirilib.

“Ötən il Gürcüstan Ermənisana 17 minə yaxın avtomobil ixrac edib. Lakin ölkə Gömrük İttifaqına daxil olduqdan sonra orta sinifli avtomobillər üçün gömrük yığımının məbləği 14 min dollara çatıb. Bu, Ermənistana təkrar avtomobil ixracının üzərindən xətt çəkir. - Gürcüstan Avtomobil Federasiyasının rəhbəri Şalva Oqbaidze bildirib.

Bu, Gürcüstanın tarixində təkrar avtomobil ixracına  ilk zərbə deyil. 2009-cu ildə Qazaxıstanla da eyni durum yaranmışdı. Bu ölkəyə ildə 20 minədək avtomobil gətirilirdi. Lakin Qazaxıstan Gömrük İttifaqına qoşulduqdan sonra Gürcüstandan avtomobil daşınması sıfıra enib.

Gürcüstan hökuməti avtodilerlər üçün nəticənin yumşaldılması üzrə yalnız bir tədbir görüb: gömrük yığımlarının ödənilməsi üçün 45 günlük möhlət tətbiq edilib.

Tbilisinin 11 km.-də yerləşən Rustavi avtomobil bazarı Qafqazda ən böyük bazardır. Onun sahəsi 250 000 kv. metr təşkil edir. Avtokompleks Gürcüstanı Azərbaycan və Ermənistanla birləşdirən  magistral trass boyunca yerləşir.

Uzun illərdir Gürcüstanın xarici ticarət dövriyyəsində minik avtomobillərinin ixrac-idxalı mühüm yer tutur. 2013-cü ildə ölkəyə 710,5 mln. dollar məbləğində minik avtomobili gətirilib ki, bu da idxalın ümumi həcminin 9%-ni təşkil edir. Gürcüstan 703,9 mln. dollar dəyərində avtomobil ixrac edib ki, bu da ixracın ümumi həcminin 24,2%-ni təşkil edir. Bu barədə Statistika Departamentindən bildirilib.

  2013-cü ildə Gürcüstandan Azərbaycana 401,1 mln. dollar həcmində minik avtomobili ixrac edilib ki, bu da Gürcüstan ixracının yarısından çoxdur    (710,2 mln. dollar).

2014-cü ilin yanvar-aprel aylarında Gürcüstandan Azərbaycana 97 694 min dollar məbləğində avtomobil ixrac edilib.02D-