Bakıda 50 mərtəbəli biznes mərkəzi tikiləcək

bakıda ən hündür Flame Towers kompleksinin sahibi Heydər Əliyev prospektində 50 mərtəbəli biznes mərkəzi tikəcək. Layihə artıq razılaşdırılıb.

Dövlət Şəhərsalma və Arxitektura Komitəsinin məlumatına görə, Bakı ŞİH “Azinko Holding” və “Azvil Tikinti” MMC-yə 3000 m2 ərazidə 50 mərtəbəli bina tikməyə icazə verib. Binanın ümumi sahəsi açıqlanmır. Tikinti üçün Heydər Əliyev pr.,109 ünvanında 1 ha sahə ayrılıb.

Layihəçi “Mazeron Mimarlık Dekorasyon Tekstil TİC.A.Ş.” və “ARXİN-M LTD” MMC-dir.

Hazırda Bakıda ən yüksək bina Flame Towersdir – 39 mərtəbəli kompleksin hündürlüyü 190 metrdir. Kompleksi 2007-2012-ci illərdə Azərbaycan-Türkiyə “DİA Holding” şirkəti «Moskva» otelinin yerində “Azinko Holding” MMC-nin sifarişi ilə tikib.

“Azinko Holding” MMC 2006-cı ildə yaradılıb və 5 şirkətdən ibarətdir (“KLASS AZ KO” , “XƏZƏR AZ KO”, “SAHİL AZ KO”, ”AZ-İN-KO” MMC  və “REGİONAL İNŞAAT”). Yerli KİV yazır ki, holdinq hakim ailəyə məxsusdur. Şirkətlərin hamısının hüquqi ünvanı eynidir – Bakı, Zərifə Əliyeva, 3. Həmin ünvanda “AZENCO Group”, “Azərbaycan Sənaye Bankı”, “Azərbaycan Sənaye Sığorta” və s yerləşir. 08B