Bakıda Azərbaycan-Litva biznes forumu keçiriləcək

Aprelin 9-da Bakı Biznes Mərkəzində Azərbaycan-Litva biznes forumu keçiriləcək. Azərbaycanlı sahibkarlarla görüşmək üçün bir neçə özəl şirkətin, həmçinin Klaypeda Azad İqtisadi Zonanın nümayəndələri Azərbaycana gələcəklər. 

Azərbaycanda İxracın və İnvestisiyaların Təşviqi Fondundan (AZPROMO) Turan-a bildirilib ki, forumda Litva tərəfdən təhsil, tikinti, maliyyə, İKT, bərpa olunan enerji, ətraf mühitin mühafizəsi, suyun təmizlənməsi, avtomobil daşımaları, logistika, ticarət üçün avadanlıq istehsalı, avtomobil hissələrinin satışı və digər sektorları təmsil edən nümayəndələr iştirak edəcəklər. 

Azərbaycan və Litva işgüzar dairələri arasında görüşlər 2008-ci ildən keçirilir. Sonuncu dəfə belə forum Vilnüsdə prezident İlham Əliyevin rəsmi səfəri çərçivəsində keçirilib. Azərbaycan KİV-i bildirib ki, yerli oliqarxların Litvada biznes maraqları var.

Azərbaycan Dövlət Gömrük Komitəsinin məlumatına görə, 2012-ci ildə iki ölkə arasında əmtəə dövriyyəsi $24 mln. təşkil edib ki, bu da ötən ildə olduğundan 4% azdır. Litvaya Azərbaycan ixracı 47% azalaraq $2,7 mln. təşkil edib. Litvadan $21,3 mln. həcmində mal göndərilib. Bu 2011-ci ilin göstəricisini 6,5% üstələyib. 08B