DEVAMM ADNA rəhbərliyini səhvini düzəltməyə çağırır

Dini Etiqad və Vicdan Azadlığı Müdafiə Mərkəzi (DEVAMM) Azərbaycan Dövlət Neft Akademiyasında (ADNA) hicablı tələbələrin dərsə buraxılmaması ilə bağlı bəyanat yayıb. 

Bu addımın ADNA rəhbərliyinin tapşırığı əsasında atıldığı, bu addıma izah kimi ADNA-nın Nizamnaməsində nəzərdə tutulan hansısa məhdudiyyətlərin göstərildiyi qeyd edilir.  

Müəlliflər akademiyada baş verənləri insan haqlarının kobud pozulması sayırlar. Tələbənin hicablı olmasına görə dərsə buraxılmaması mövcud qanunvericiliyə zidd hərəkət adlandırılır, kəskin pislənilir. Bu, vətəndaşların həm dini etiqad azadlığının, həm təhsil hüququnun pozulması, həm də ayrı-seçkilik hesab edilir. 

ADNA-nın daxili sənədi olan Nizamnaməsində hicaba qadağa müddəasının əksini tapması Konstitusiyanın pozulması sayılır. Müəlliflər ADNA rəhbərliyini bu qanun pozuntusunu təcili aradan qaldırmağa, tələbələrin hüquqlarını təxirəsalınmaz olaraq bərpa etməyə çağırırlar. 

Son olaraq müəlliflər Dini Komitəni, Qafqaz Müsəlmanları İdarəsi sədrini məsələyə müdaxilə edərək hicablı tələbələrin hüquqlarının bərpası yönündə təcili addımlar atmağa çağırıblar. -05D-