Beynəlxalq audit şirkətləri 9 müflis bankı qiymətləndirəcək

Ləğv prosesində olan 9 müflis  bankın  aktivlərinin qiymətləndirilməsinə baxmayaraq, ləğvetmə prosesində şəffaflığın və qiymətləndirmənin  beynəlxalq standartlara uyğun təmin edilməsi məqsədi ilə beynəlxalq audit şirkətlərinə həmin bankların qiymətləndirilməsi üçün təklif məktubu göndərilib.

9 bankın - «Royalbank», «Bank of Azerbaijan», «Texnikabank», «AtraBank», «Qafqaz İnkişaf Bankı», «Bank Standard», «Kredobank», «Gəncəbank», «Zaminbank» ləğvedicisi Əmanətlərin Sığortalanması Fondudur.

Məktublar «Ernst & Yanq», «Grant Thornton», «Pricewaterhouse Coopers», «Moss Adams Azərbaycan», «Moore Stephens Azerbaijan», «Deloitte & Touche», «KPMG Azərbaycan», «Baker Tılly Audit Azərbaycan», «RSM Azerbaijan», «BDO Azərbaycan» beynəlxalq audit şirkətlərinə göndərilib.

“Baker Tılly Azərbaycan” və “RSM Azerbaijan” beynəlxalq audit şirkətlərindən əməkdaşlığa hazır olmaları barədə cavab məktubu alınıb.

Bütün şirkətlərdən cavab məktubları daxil olduqdan sonra əməkdaşlığa hazır olan şirkətlərlə məlumatın məxfi saxlanılması haqqında müqavilə imzalanacaq.

Növbəti mərhələdə ləğv prosesində olan banklar üzrə bütün məlumatlar təkliflərin hazırlanması üçün həmin audit şirkətlərinə ötürüləcək. Ləğv prosesində olan banklar üçün qiymət təklifləri alındıqdan sonra müvafiq qaydada beynəlxalq audit şirkətləri seçiləcək.

Əmanətlərin Sığortalanması Fondu qeyd edib ki, ləğv prosesində olan QSC “Bank Standard” KB-nin qiymətləndirilməsi KPMG şirkəti, ləğv prosesinə dair hüquqi rəyin verilməsi isə BM Morrison şirkəti tərəfindən artıq həyata keçirilib.

Fondun məlumatına əsasən, hazırda ləğv prosesində olan bankların əmlakları yerli qiymətləndiricilər tərəfindən bazar və likvid dəyəri müəyyən edilməklə qiymətləndirilir.

Məhkəmə kreditorların siyahısını təsdiq etdikdən sonra  ləğvetmə planlarını  təsdiqləyəcək və kreditorlar komitəsinin yaranmasına etiraz etməzsə, ləğvedici tərəfindən kreditorlar komitəsi yaradılacaq.

Yuxarıda göstərilən prosedurlardan sonra hər bir ləğv prosesində olan bankın müfəssəl ləğv planı, o cümlədən aktivlər və öhdəliklər  haqqında məlumat kreditorlara və ictimaiyyətə açıqlanacaq. Sonra satış qaydalarına müvafiq olaraq açıq hərrac yolu ilə əmlakların satışı təşkil olunacaq. Daxil olunan vəsaitlər  “Banklar haqqında”Qanuna müvafiq ardıcıllıqla kreditorlara ödəniləcək. 71D