BMK aqrobiznes sahəsində məhsuldarlığın və rəqabətliliyin artırılmasına dəstək verəcək

Beynəlxalq Maliyyə Korporasiyası (BMK) Azərbaycanda aqrobiznes sahəsində məhsuldarlığın və rəqabətliliyin artırılmasına dəstək verəcək.

Dekabrın 18-də Bakıda Azərbaycan Respublikasının Kənd Təsərrüfatı Nazirliyi ilə bu barədə saziş imzalanıb.

Mərasimdə çıxış edən kənd təsərrüfatı naziri Heydər Əsədov deyib ki, sənəd fermerlərin müxtəlif kənd təsərrüfatı bitkilərinin yüksək məhsuldar sortları, o cümlədən idxal olunan toxumları əldə etmək imkanlarının artırılmasına, dövlət sort sınağı, qeydiyyatı və mühafizəsinin tənzimlənməsinə, institusional gücləndirmənin dəstəklənməsi yolu ilə kənd təsərrüfatı sektorunda məhsuldarlığı və rəqabətliyinin artırılmasına yardım edəcək. Bu sahədə BMK ilə əməkdaşlığın praktiki müstəvidə davam etdirilməsi və Avropa İttifaqının təcrübəsindən də istifadə olunması məqsədəmüvafiq hesab edilir.
«Azərbaycan Respublikası Kənd Təsərrüfatı Nazirliyi ilə əməkdaşlıq  BMK-nın Azərbaycanda iqtisadiyyatın şaxələndirilməsi və davamlı inkişafının təmin olunması strategiyasının vacib hissəsidir. Ümid edirik ki, kənd təsərrüfatı sektorunda məhsuldarlığın artırılmasına yardım etməklə, Azərbaycanda tarazlı inkişafın təmin olunmasına, beynəlxalq səviyyədə ölkənin rəqabətliliyin artırılmasına, habelə yeni iş yerlərinin yaradılmasına dəstək verə biləcəyik”, deyə BMK-nın Azərbaycan nümayəndəliyinin rəhbəri xanım Aliyə Əzimova qeyd edib.

Kənd təsərrüfatı Azərbaycanda məşğulluğun təmin edilməsi üzrə vacib sektorlardandır. Təzə meyvə və tərəvəz ixracı üzrə böyük potensial var. Amma təchizat zəncirinin zəif inkişafı və məhsuldarlığın aşağı olması bu potensialdan istifadəyə mane olur, deyə mütəxəssislər bildirir.

Yeni saziş İsveçrənin İqtisadi Məsələlər üzrə Dövlət Katibliyi (SECO) tərəfindən maliyyələşdirilən Azərbaycan İnvestisiya Mühiti Layihəsi çərçivəsində həyata keçirilib. 08D