COP29-da İqtisadiyyat Nazirliyinin gündəliyi

İqtisadiyyat Nazirliyi COP29 çərçivəsində beynəlxalq qurumlar və digər ölkələrin rəsmiləri ilə əməkdaşlıq edərək müxtəlif iqtisadi və iqlimlə bağlı məsələlərə həsr olunmuş tədbirlər planını açıqlayıb, nazirlik məlumat yayıb.

Əsas tədbirlər:

• 13 noyabr: İqtisadiyyat Nazirliyi Dünya İqtisadi Forumu ilə “Əməkdaşlığın gücü: Xalis sıfır üçün qüvvələrin birləşdirilməsi” adlı Yüksək Səviyyəli Sessiya keçirəcək.
• 14 noyabr: İqtisadiyyat Nazirliyi və Ümumdünya Ticarət Təşkilatının (ÜTT) birgə təşkilatçılığı ilə Maliyyə, İnvestisiya və Ticarət Günü (Climate FIT Day) çərçivəsində Bakı İqlim Maliyyəsi, İnvestisiya və Ticarət Təşəbbüsü (BICFIT) təqdim olunacaq.
• Biznes, İnvestisiya və Xeyriyyəçilik Platforması: Bu platforma çərçivəsində iqlim maliyyəsi və strateji tərəfdaşlıqlar üzrə müzakirələr keçiriləcək.
• Yaşıl Maliyyə Fəaliyyət Fondunun Təşəbbüsü: “Maliyyə vasitəsilə davamlı gələcəyin gücləndirilməsi” mövzusunda keçiriləcək tədbirdə İqlim Maliyyəsi Fəaliyyət Fondunun (CFAF) təqdimatı olacaq.
• Nazirlər Görüşləri: İqlim, İnnovasiya və Ticarət üzrə CAREC Tərəfdaşlığı, Türk Dövlətləri Təşkilatının İqlim və Yaşıl İqtisadiyyat Tərəfdaşlığı, həmçinin SPECA İqlim və İnnovasiya Dialoqu mövzusunda görüşlər keçiriləcək.
• 15 noyabr - Enerji, Sülh, Yardım və Bərpa Günü: İqtisadiyyat Nazirliyi və Harvard Universitetinin “Growth Lab” Beynəlxalq İnkişaf Mərkəzi ilə birgə hazırlanmış “Yaşıl Artım” portalının təqdimatı keçiriləcək, “Karbon qiymətqoyması: Cari çağırışlar və yeni strategiyalar” və iqlim dayanıqlılığında özəl sektorun rolu üzrə müzakirələr təşkil olunacaq.
• 16 noyabr - Elm, Texnologiya və İnnovasiya Günü: KOB-ların yaşıl iqtisadiyyatda rolu üzrə konfrans, “Süni İntellektin Təsiri: Rəqəmsal İqtisadiyyatda İdarəetmənin Yeni Dövrü” mövzusunda müzakirələr və AI-nın ətraf mühitə təsirləri azaltmaq gücü üzrə tədbirlər keçiriləcək.
• 20 noyabr - Urbanizasiya, Nəqliyyat və Turizm Günü: Avropa Yenidənqurma və İnkişaf Bankı (AYİB) SPECA regionundan yaşıl şəhər liderlərinin dəyirmi masasını keçirəcək, həmçinin SPECA Çoxtərəfli Etimad Fondu ilə bağlı brifinq təşkil olunacaq.
• Razılaşmalar və Görüşlər: İqtisadiyyat Nazirliyi və strukturuna daxil olan qurumların İslam İnkişaf Bankı, Beynəlxalq Ticarət Mərkəzi və bir sıra xarici şirkətlərlə sənədlərin imzalanması gözlənilir. Bundan əlavə, beynəlxalq qurumlar və xarici rəsmilərlə ikitərəfli görüşlər keçiriləcək.

Nazirlik vurğulayıb ki, bu tədbirlər əməkdaşlığı gücləndirmək, iqlim problemlərini həll etmək və davamlı iqtisadi inkişafı təşviq etmək məqsədini daşıyır.