Daşınmaz əmlakın icbari sığortası avqustda 700 min manat gətirib

İcbari Sığorta Bürosunun üzvü olan sığorta şirkətləri ilin əvvəlindən daşınmaz əmlakın icbari sığortası üzrə 72 min 869 müqavilə imzalayıblar. Bunun 6 min 260-ı avqustun payına düşüb və 680 min 276 manat mükafat yığılıb. Avqust müqavilələrinin 71,3%-i yaşayış evi mənzillərin, 0,5% inzibati binaların 28,2% başqa əmlakın sığortası üzrədir. Müqavilələrin 47%-i Bakının payına düşür. 

Avqustda daşınmaz əmlakın istismarı zamanı mülki məsuliyyətin icbari sığortası üzrə 205 müqavilə bağlanıb və 18 min 330 manat mükafat əldə edilib. 

Dövlət Sığorta Nəzarəti Xidməti 2013-ci ildə  daşınmaz əmlakın icbari sığortası üzrə 150 min müqavilə bağlanacağını gözləyir. 

2012-ci ildə bu növ üzrə 125,195 min müqavilə bağlanılıb və 11 mln 392,973 min  manat mükafat yığılıb.  

Daşınmaz əmlakın icbari sığortası daşınmaz əmlakın yanğın və ya digər hadisələr nəticəsində zədələnməsi, məhv olması, yaxud hər hansı formada itkisi ilə bağlı dəyən zərərin əvəzinin ödənilməsi məqsədi ilə tətbiq edilir. Bu məqsədlər üçün hüquqi və fiziki şəxslərə məxsus tikililərin, yaşayış və qeyri-yaşayış sahələrinin, yaşayış evləri, binalarının və mənzillərin, habelə dövlət əmlakının sığortası icbaridir. Yaşayış binalarının, yaşayış evlərinin və mənzillərin icbari sığortası onların konstruktiv elementlərinə, otaqlarına, o cümlədən şüşələr də daxil olmaqla qapı və pəncərə konstruksiyalarına, su, kanalizasiya və qaz təchizatına, habelə istilik sisteminə aid borulara, rabitə, elektrik və digər naqillərinə, bəzək elementlərinə, o cümlədən bütün növ xarici, yaxud daxili mala və suvaq işlərinə, divar, tavan və döşəməyə dəyən zərərlərə təminat verir. Bakıda bu növ üzrə maksimal ödəniş 25 min manat, Gəncə, Sumqayıt və Naxçıvanda 20 min manat, başqa yerlərdə 15 min manatdır. Sığorta tarifi məbləğin 0,2%-dir. --17D—