DB Azərbaycana maliyyə savadlılığı üzrə texniki yardım hazırlayır

Oktyabrın 19-da Bakıda Maliyyə Bazarlarına Nəzarət Palatasının Direktorlar Şurasının sədri Rüfət Aslanlı maliyyə sektoru üzrə baş mütəxəssis Anjela Priqojinanın rəhbərlik etdiyi Dünya Bankının İstehlakçıların Müdafiəsi və Maliyyə Savadlılığı üzrə Texniki Yardım Missiyasını qəbul edib.

Görüşdə istehlakçıların hüquqlarının müdafiəsi və maliyyə savadlılığı sahəsində atılan addımlar və əməkdaşlıq perspektivləri müzakirə edilib. DB təmsilçiləri bu sahədə Dünya Bankı ilə Azərbaycan arasında dialoqunun davam etdirilməsinin məqsədəuyğun olduğunu qeyd ediblər.  
Görüşdə həmçinin istehlakçıların hüquqlarının müdafiəsi üzrə hüquqi, tənzimləyici və nəzarətlə bağlı islahatlara dair geniş fikir mübadiləsi aparılıb

 «Dünya Bankının istehlakçıların hüquqlarının müdafiəsi, müraciətlərə baxılması, eləcə də maliyyə savadlılığının artırılması ilə bağlı bilik və potensialın gücləndirilməsi tədbirlərinin təşkili Palata üçün maraqlıdır və dərindən öyrəniləcək», deyə Rüfət Aslanlı bildirib. 

2011-ci ildə DB Kapital bazarının modernləşdirilməsi layihəsi üçün 12 mln dollar ayırıb. Layihə 2015-ci ildə başa çatıb. Layihənin iki komponentini İsveçrənin İqtisadi Məsələlər üzrə Dövlət Katibliyi (SECO) maliyyələşdirib və $1,6 mln ayırıb. Layihə çərçivəsində Kapital bazarı üzrə Təlim Mərkəzi yaradılıb. Mərkəz pullu əsasla məşğələlər keçirir.  08D