Dəniz Üzgüçülüyünün Təhlükəsizliyi Mərkəzinin nizamnamə və strukturu təsdiq edilib

 Nazirlər Kabinetinin qərarı ilə Azərbaycan Respublikası Dövlət Dəniz Administrasiyasının tabeliyində Dəniz Üzgüçülüyünün Təhlükəsizliyi Mərkəzi yaradılıb.

Mərkəzin nizamnamə və strukturu təsdiq edilib, işçilərin say həddi 135 vahid müəyyən edilib.

Maliyyə Nazirliyinə tapşırılıb ki, Mərkəzin 2014-cü ilin sonunadək cari fəaliyyətinin təşkili məqsədi ilə Azərbaycan Respublikasının 2014-cü il dövlət büdcəsində nəzərdə tutulmuş Ehtiyat Fondundan Dövlət Dəniz Administrasiyasına 2 mln 565,265 manat məbləğində vəsait ayrılsın.

Maliyyə Nazirliyi 2015-ci ildən başlayaraq mərkəzin cari fəaliyyətinin təşkili məqsədi ilə dövlət büdcəsində müvafiq məbləğdə vəsait nəzərdə tutmalıdır.

Dünyanın bütün aparıcı ölkələrində Dəniz Üzgüçülüyünün Təhlükəsizliyi Mərkəzi olur. Onlar gəmilərin hərəkətini tənzimləyir, radilokasiya nəzarəti həyata keçirir, hərəkət rejimində çətinlik yarananda gəmilərə zəruri informasiya verir. Onlar Fəlakət zamanı qlobal dəniz rabitə sisteminin işini təmin edir, losman, yedək, buzqıran təminatını həyata keçirir.

Beynəlxalq konvensiyaya əsasən, Azərbaycanda  dəniz üzgüçülüyünün təhlükəsizliyi üçün regional sistemlər yaradılacaq. Həmçinin Fəlakət zamanı qlobal dəniz rabitə sistemi, eləcə də avtomatik identifikasiya sistemi  tətbiq ediləcək.–17D—