Ekspert: «hökumətin xoşa gəlməyən ofşor zonaların seçimi üzrə meyarı aydın deyil»

Nazirlər Kabineti yanvarın 6-da я “Qiymətli kağızlar bazarında lisenziyalaşdırılan şəxslərin səhmdarı ola bilməyən şəxslərin qeydiyyata alındığı ofşor zonaların Siyahısı”nı təsdiq edib.

Siyahıya bu ofşorlar daxil edilib: Anqila.  Antiqua və Barbuda.  Aruba. Baham adaları. Beliz. Kuk adaları. Qrenada. Maldiv adaları. Nauru. Antill (Niderland).  Panama. Samoa. Sent-Kits və Nevis.  Seyşel. Turk və Kaykos. Vanuatu. ABŞ Virgin adaları.

Maraqlıdır ki, bu siyahıda Britaniya Virgin adaları, Men, Cersi, Kayman adaları və s kimi məşhur ofşorlar yoxdur.

Hüquqşünas Əkrəm Həsənov Turan-a müsahibəsində deyib ki, Nazirlər Kabinetinin məntiqi aydın deyil. «Siyahıda Britaniya, Niderland kimi ölkələrin əraziləri də var, müstəqil dövlətlər də. Amma bu tipli başqa ofşorlar da var ki, siyahıda adları yoxdur. Hər hansı ofşor zonaya dair məhdudlaşdırmanın ya siyasi, ya da iqtisadi səbəbi olmalıdır. Siyasi səbəb: məsələn, Azərbaycana düşmən movqe və ya düşmənimizlə dostluq və s. və i.a. İqtisadi səbəb: ofşorun verdiyi imkanlar iqtisadiyyatımıza zərər vurur, məsələn, vergi dərəcələri çox aşağıdır, yaxud heç yoxdur və s. Nazirlər Kabineti siyahısını əsaslandırmayıb».

Ekspertin fikrincə, "Normativ hüquqi aktlar haqqında" Konstitusiya Qanununa ziddir. Qanunun 48.2.1-ci maddəsinə əsasən, normativ hüquqi aktın qəbul edilməsi zərurətinin əsaslandırılması, o cümlədən maliyyə-iqtisadi əsaslandırılması olmalıdır. Lakin reallıqda əksər hallarda belə əsaslandırmalar ya yoxdur, ya da çox bəsitdir».

Konkret halda hesab etmək olar ki, siyahı konkret maraqlara xidmət edir: artıq mövcud səhmdarların mənsub olduqları ofşor zonalar daxil edilməyib, deyə Əkrəm Həsənov hesab edir.

Nazirlər Kabinetinin qərarı 1 iyul 2015-ci ildə qüvvəyə minən “Qiymətli kağızlar bazarı haqqında” AR Qanununun icrasını təmin etmək məqsədi ilə qəbul edilib. 08B