Gömrükçülər güzəştlərdən sui-istifadə edən fiziki şəxslərdən şikayətçidir

Bakıda "Multisektorial əməkdaşlıq: müasir dövrdə iqtisadiyyatın inkişafında gömrük xidmətinin rolu" mövzusunda beynəlxalq konfrans keçirilib.

Dövlət Gömrük Komitəsinin (DGK) sədri Aydın Əliyevin sözlərinə görə, fiziki şəxslərin bir hissəsi gömrük güzəştlərindən sui-istifadəyə çalışır. Bu isə büdcə mədaxilinə təsir edir. Bununla əlaqədar gömrük güzəştlərinin qeyri-leqal istifadəsinin qarşısının alınması ilə bağlı təkliflər hazırlanaraq Nazirlər Kabinetinə göndərilib.

Xatırladaq ki, Gömrük Məəclləsinə görə, fiziki şəxslər gömrük rüsumu ödəmədən şəxsi istifadə üçün məhdud həcmdə mallar gətirə bilərlər. Ümumi qiymət $1,5 min, yetkinliyə çatmayan hər kəs üçün $500-dır.

Konfrans Bakı Ali Neft Məktəbinin, Dövlət Gömrük Komitəsinin Akademiyasının və Beynəlxalq Gömrük Universitetləri Şəbəkəsinin Bakı regional ofisinin birgə təşkilatçılığı ilə gerçəkləşib. Tədbirdə Bakı Ali Neft Məktəbinin rektoru Elmar Qasımov, BP şirkətinin Azərbaycan, Gürcüstan və Türkiyə üzrə əlaqələr, xarici işlər və strategiya üzrə vitse-prezidenti Bəxtiyar Aslanbəyli, Beynəlxalq Gömrük Universitetləri Şəbəkəsinin nümyəndəsi Lars Karlson  və başqa rəsmi şəxslər iştirak edib. --17D—