"Güzəştli Mənzil Sistemi haqqında Əsasnamə�nin təsdiq edilməsi barədə fərman imzalanıb

Dünən dövlət başçısı İlham Əliyev "Güzəştli Mənzil Sistemi haqqında Əsasnamə"nin təsdiq edilməsi barədə fərman imzalayıb. Bununla əlaqədar olaraq, hökumətə prezident aktları, hökumətin özünün, mərkəzi icra hakimiyyəti orqanlarının normativ-hüquqi aktlarının fərmana uyğunlaşdırmaq və bu sənədlə bağlı digər məsələləri həll etmək tapşırılıb. Ədliyyə Nazirliyi və AR prezidenti yanında fəaliyyət göstərən Mənzil İnşaatı Dövlət Agentliyinə də müvafiq göstərişlər verilib.

Bundan əlavə, bir qədər əvvəl, məhz, mayın 10-da, Mənzil İnşaatı Dövlət Agentliyinin direktoru Samir Nuriyev də yaxın günlərdə güzəştli mənzil almaq istəyənlərin qeydiyyatına başlanacağı barədə bəyanatla çıxış etmişdi. Güzəştli mənzilə hüquq sahiblərinin qeydiyyatı elektron formada aparılacaq, bunun üçün lazım olan elektron sistemin yaradılması isə artıq, demək olar ki, başa çatıb və e-gov.az portalında yerləşdiriləcək. Təkcə bu sistemin Əsasnaməsinin təsdiq olunması qalır və yalnız bundan sonra sənəd qəbuluna başlamağı vəd edirlər.

Bir müddət öncə deyildiyi kimi, sənəd qəbuluna Bakı və Sumqayıtda 1, 2, 3 saylı ASAN xidmət mərkəzləri qoşulacaq. Güzəştli mənzil almaq üçün tələb olunan sənədlərin siyahısına gəldikdə isə Dövlət Agentliyi onu artıq təsdiq edib və onun nəzdində fəaliyyət göstərən MIDA MMC onu öz www.mida.az saytında yerləşdirib. Elə burada da güzəştli şərtlərlə mənzil almaq hüququna malik olan vətəndaşlar kateqoriyaları göstərilib.

Açığını deyək, mənzillə bağlı problemlərlə üzləşən əhalinin əksəriyyəti üçün indiki halda heç nə dəyişməyib, çünki güzəştli mənzil almaq hüququn artıq sosial ipoteka ilə əhatə olunmuş vətəndaşlara veriləcək. Yeganə müsbət məqam isə ondan ibarətdir ki, onlar üçün mənzil bütövlükdə bazar qiymətlərindən ucuz başa gələcək.

Beləliklə, bu qurumun güzəştlə mənzil almaq hüququ olan şəxslərin iki kateqoriyasının təqdim olunduğu saytına keçirik.

Biinci kateqoriyaya gənc ailələrin 35-yaşına çatmamış üzvləri daxildir: bu, şəhid ailələrinin üzvləri (ər/arvad, uşaqlar); Milli Qəhrəmanlar (özü, ər/arvad, uşaqlar); məcburi köçkün və ya ona bərabər tutulan şəxslər; ən azı 3 il dövlət qulluğunda işləmiş vətəndaşlar, o cümlədən xüsusi növ dövlət xidməti keçmiş şəxslərdir. Buraya həmçinin ən azı 5 il dövlət ümumtəhsil məktəblərində müəllim işləmiş şəxslər; fəlsəfə doktoru elmi dərəcəsi olan vətəndaşlar daxildir. İdman nailiyyətləri də sizə güzəştli şərtlərlə mənzil almaq hüququ verir - bunun üçün idman sahəsində xüsusi xidmətləriniz olmalıdır: fəxri bədən tərbiyəsi və idman xadimi, respublika miqyaslı yarışların qalibi (I yer), beynəlxalq əhəmiyyətli yarışların I, II və ya III yerləri tutmuş mükafatçıları.

İkinci kateqoriyada hüquq sahibləri ailə vəziyyətindən asılı olmayaraq nəzərdən keçirilir. Bura elmlər doktoru elmi dərəcəsi olan şəxslər; azı 15 il dövlət qulluğunda işləmiş vətəndaşlar və ən azı 3 il hərbi xidmətdə olan əsgərlər (müddətli hərbi xidmətdə olmuşlardan başqa), ehtiyatda və istefada olan hərbi qulluqçular ("Hərbi Vəzifə və Hərbi Xidmət haqqında" AR Qanununun 41.0.6, 41.0.7, 41.0.8, 41.0.10, 42.0.3, 42.0.4 və 42.0.5-ci maddələrində nəzərdə tutulmuş hallarda ehtiyat və istefada olanlar istisna edilməklə) daxildir.

Bundan başqa, daxili işlər orqanlarında ən azı 3 il xidmət keçmiş xüsusi rütbəsi olan vətəndaşlar da sənədlərini verə bilərlər. Qeyd etmək lazımdır ki, bütün sadalanmış kateqoriyadan olan vətəndaşlarımızın sosial ipotekadan istifadə etmək hüququ artıq var idi, indi isə, yeni Qaydaya görə, həmin şəxslər də sosial mənzili orta bazar qiymətindən ucuz aımaq hüququ qazanır.

Bütün bu sadalanmış şəxslər "Güzəştli mənzil" sisteminə müraciət edərək və qeydiyyatdan keçərək mənzili seçə biləcəklər. Elektron sistem ikipilləli olacaq: ilk növbədə, müraciət edən vətəndaş tərəfindən təqdim edilmiş məlumatlar əsasında ərizəçinin təsdiq olunmuş kateqoriyaya aid olib-olmadiğı yoxlanacaq. Müraciətə sonradan qeydə almaq barədə qərar çıxarmaq üçün 5 iş günü ərzində baxılacaq.

Daha sonra, prosedurun növbəti mərhələsində, artıq satışa çıxarılmış mənzillər barədə elan dərc olunduqdan sonra, sosial mənzil almaq hüququ qazanmış və qeydiyyatdan keçmiş iddiaçı mənzilin parametrlərini seçə, otaqların sayını, mərtəbəni və s. göstərə bilər. Təsdiq olunmuş Qaydalara əsasən, mənzil satışı haqqında elanı yalnız layihə üzrə tikinti işlərinin 30% və daha çox faiz yerinə yetirildiyi binalar üzrə və satışın başlanmasına ən azı 30 gün qalmış vermək olar .

Mənzil İnşaatı Dövlət Agentliyinin məlumatına və MMC-nin saytında yerləşdirilmiş informasiyaya əsasən, güzəştli mənzil sistemi bazar qiymətləri ilə mənzil almaq imkanı olmayan külli sayda digər vətəndaşlara aid deyil. Güzəştli mənzil sisteminin azgəlirli insanlar, aztəminatlı və gənc ailələr üçün nəzərdə tutulduğu barədə əvvəllər səsləndirilmiş məlumatın mənbələri məlumdur.

Dövlət başçısının qarşıya qoyduğu məqsədlərdən biri də vətəndaşların mənzil şəraitinin yaxşılaşdırılmasıdır. "Əhali sayının artması vətəndaşlarımızın mənzillə olan ehtiyaclarının təmin olunması məsələsini daha da aktuallaşdırır. Aztəminatlı vətəndaşların, gənc ailələrin mənzil problemlərinin həlli prezident İlham Əliyev tərəfindən prioritet vəzifə kimi müəyyənləşdirilib", - deyə Nuriyev vurğulayıb.

Bundan öncə mətbuat yazırdı ki, 2 minə yaxın ailə güzəştli şərtlərlə mənzil ala biləcək. Güzəştli mənzilin azgəlirli insanlar, aztəminatlı və gənc ailələr üçün əlçatan olacağı vəd edilmişdi.