Hökumət buğda idxalını gömrük vergisi və rüsumdan azad edib

Nazirlər Kabinetinin 24 sentyabr tarixli qərarı ilə buğda, buğda unu və ya buğda-çovdar unu idxal gömrük vergisi və ƏDV-dən azad edilib. Qərar bir il qüvvədədir və dünya bazarında taxılın qiymət artımı ilə bağlıdır.    Hökumət ölkə daxilində taxıl məhsullarının qiymətini tənzimləmək üçün bu addımı dəfələrlə atıb. Azərbaycan daxili istehsal hesabına əhalini taxılla təchiz edə bilmir. Hər il ölkəyə 1,3-1,5 mln ton taxıl idxal edilir. Rəsmi statistika isə ölkədə 1,6 mln ton dənli və dənli-paxlalı bitki istehsalı barədə məlumat verir. 

Taxıl bazarında çlışan şirkətlərdən birində Turan-a deyiblər ki, məhsul az olduğu üçün dünyada taxıl bahalanıb. İqtisadi İnkişaf Nazirliyi unüyütmə kombinatlarından xahiş edib ki, unun pərakəndə qiymətini artırmasınlar. Hazırda unun 50 kq-lıq kisəsi 20 manatdır. Bazarın indiki konyunkturuna əsasən, indi 1 kisə un 26 manat olmalı idi, deyə şirkətdə bildiriblər. 

Bu gün Qazaxıstan buğdası sərhəddə tonu $400-a təklif edilir. Amma gömrük ödənişinin ləğvi daxili bazarda qiyməti bu səviyyədə saxlamağa imkan verəcək, deyə şirkətdə düşünürlər.  

Sonuncu dəfə taxıla rüsum və ƏDV 2010-cu ilin dekabrında 20 iyul 2011-ci ildə ləğv edilib. 08B