Holcim (Azerbaijan) tullantıların utilizasiyasına başlayır

Holcim (Azerbaijan) ASC bu ilin oktyabrından sement istehsalında tullantıların yandırılmasından alternativ enerji mənbəyi kimi istifadə edəcək. 

İsveçrədəki baş ofis tullantıların utilizasiyası texnologiyasına (işlənmiş avtomobil şinləri, neft tullantıları) malikdir və onu Azərbaycanda tətbiq etmək istəyir. Bu məqsədlə Holcim (Azerbaijan) Sahil qəsəbəsi sakinləri üçün bu texnologiya haqqında ictimai dinləmə keçirib. Tədbirin məqsədi Qaradağ rayonu sakinləri üçün texnoloji prosesin əhəmiyyəti, texniki göstəriciləri və digər məsələlərlə bağlı məlumat vermək idi. SC-nin mütəxəssisi Samir Əliyev Turan-a bildirib ki, təkrar emal üçün yaramayan avtomobil şinləri utilizasiya ediləcək. Bundan başqa, tullantıların kimyəvi tərkibi dövlət normativlərinə uyğun olmalıdır. Onu xüsusi testlə müəyyən edəcəklər. 

Avtomobil şinlərindən biznes yaratmaq da olar. Holcim (Azerbaijan) ASC onları vətəndaşlardan və şirkətlərdən almağı planlaşdırır. Holcim (Azerbaijan) ASC-nin proqnozuna görə, avtomobil şinlərinin tullantıları yanacağa tələbatın 12-15%-i ödəyəcək. Bununla sement istehsalında qazdan istifadəyə qənaət ediləcək. 

Holcim (Azerbaijan) ASC-nin istehsal gücü ildə 1,7 mln ton sementdir. Holcim Group (İsveçrə) səhmlərin 64%-ə sahibdir. 08B