I yarımildə yol-nəqliyyat tikintisinə 7,3 mlrd manat investisiya qoyulub

Bu il iyulun I yarısında ölkədə yük daşımalarının ümumi həcmi 688 mln ton (ötən ilin eyni dövrü ilə müqayisədə +5,1%), sərnişin dövriyyəsi 7,1 mlrd nəfər (+7,1%) olub. I yarımildə yol-nəqliyyat tikintisinə 7,3 mlrd manat investisiya qoyulub (son 5 illə müqayisədə 10 dəfə çox). İyulun 18-də prezident İlham Əliyevin sədrliyi ilə Nazirlər Kabinetinin 2013-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında nəqliyyat naziri Ziya Məmmədov bunları bildirib. 

Onun sözlərinə görə, 82 km dəmir yolu yenidən qurulub, 340 yeni sərnişin avtobusu gətirilərək istismara verilib. Gəncə, Daşkəsən və Horadiz avtovağzallarının tikintisi davam etdirilib. Amma Məmmədov büdcə vəsaitləri ilə gətirilən avtobusların özəl daşıyıcılara niyə paylandığını izah etməyib. 

I yarımildə 430 kilometr respublika və yerli əhəmiyyətli yollar təmir olunub, 6 körpü inşa və təmir edilib. Beynəlxalq kreditlər hesabına Yenikənd–Salyan, Salyan–Şorsulu və Kür çayı üzərində körpü keçidinin tikintisi, Muğanlı–Yevlax, Tağıyev–Sahil, Hacıqabul–Bəhramtəpə avtomobil yollarının yenidən qurulması, Hacıqabul–Kürdəmir, Kürdəmir-Yevlax, Yevlax-Gəncə və Bakı-Şamaxı avtomobil yollarının 4 zolağadək genişləndirilməsi işləri davam etdirilib. 

Bakı şəhərində Buzovna-Mərdəkan–Qala avtomobil yolunun Buzovna-Mərdəkan hissəsi istismara verilib, Bilgəh–Pirşağı–Novxanı–Sumqayıt yeni avtomobil yolunun tikintisi, Ziya Bünyadov prospektinin əsaslı təmiri və prospekt boyu 4 yerdə, Qələbə meydanında və Heydər Əliyev prospektində yol qovşaqlarının tikintisi və 6 piyada keçidinin tikintisi davam etdirilib. 

Cənubi Qafqaz üzərindən keçməklə, şərqlə qərbi birləşdirən, Avrasiyanın yeni ticarət bağlantısına çevrilən Bakı-Tbilisi-Qars layihəsi 2014-cü ildə istismara veriləcək. 

Ələt qəsəbəsində Beynəlxalq Dəniz Ticarət Limanı Kompleksinin tikintisi uğurla davam etdirilir. 2014-cü ildə birinci kompleks – Bərə terminalı bütün yol infrastrukturu ilə birgə istismara veriləcək, 2015-ci ildə isə quru yük terminalının tikintisi başa çatdırılacaq. 

Büdcə vəsaiti ilə “Azərbaycan Hava Yolları” QSC üçün “Boeing”, “Airbus” və “Embraer” tipli 16 sərnişin təyyarəsi və 3 helikopter alınıb. 

Nəqliyyat siqnallarına nəzarət sistemi və “Yaşıl dalğa” tədbirlərinin tətbiqi şəhərdə nəqliyyat axınına müsbət təsir edib və nəticədə avtomobillərin orta hərəkət sürəti 35 km/saat-dan 48 km/saat-a qədər, küçələrin ötürücülük imkanı orta hesabla sutkada 20,2 min avtomobildən 27,7 min avtomobilə qədər artıb. --17D—