İcbari Sığorta Bürosu üzvlərinin aktivliyi azalıb

İcbari Sığorta Bürosunun üzvləri iyunda avtonəqliyyat vasitələri sahiblərinin mülki məsuliyyətinin icbari sığortası (yeni AVSMMİS) üzrə 5,2 mln manat (ötən ilin eyni dövrü ilə müqayisədə mənfi 7%) mükafat yığıblar. 

Büronun məlumatında qeyd edilir ki, bu növ üzrə 68,7 min müqavilə bağlanılıb (mənfi 5%). Bunun  21,2 mini tranzit müqaviləsidir. 

Bir müqavilə üzrə orta mükafat həcmi 73,7 manatdır. 

6 ayda AVSMMİS üzrə 439,2 min müqavilə (məbləğ 32,4 mln manat) bağlanılıb. 

Hazırda Azərbaycanın sığorta bazarında 11 şirkət İcbari Sığorta Bürosu çərçivəsində xidmət göstərməyə icazə alıb. Bunlar AXA MBASK, AtaSığorta, Atəşgah Sığorta, AzərSığorta, AzSığorta, Xalq Sığorta, Paşa Sığorta, Standard Insurance, Meqa Sığorta, İpək Yolu Sığorta və Azərbaycan Sənaye Sığortadır. 

İcbari Sığorta Bürosu İcbari sığorta növləri haqqında» qanun çərçivəsində yaradılıb. AVSMMİS-lə bağlı qanunda bir qəza üzrə sağlamlığa ziyan və ölümə görə maksimal ödənişin orta Avropa göstəricisi 50 min manatdır (4 sərnişin və 1 sürücü), bir fiziki şəxsin ziyanı 5 min manat, avtomobilə görə 5 min manat ödənilir. 

Qanuna görə, AVSMMİS üzrə ödənişdən imtina etmək olmaz. Hətta sərxoş, hadisə yerindən qaçan və qəsdən qəza törədən  sürücünün hərəkəti nəticəsində ziyan çəkən piyada və ya sərnişin, sürücülük vəsiqəsi olmayan (əgər avtomobilin sahibidirsə) sürücülər kompensasiya ala bilər. 

Avtomobillərin sığortasının qiyməti 1,5 min sm3 üçün (AVSMMİS üzrə) 50 manatdır. Mühərrikin həcmi artanda 1,5 (5 min sm3-ə qədər) və 5 (5 və daha artıq sm3) əmsal artırılır. 

Sərnişin nəqliyyatının avtosalonu və ya yük avtomobilinin tonnajı artanda da baza qiyməti artır. --17D-