İctimaiyyət avtonəqliyyat vasitələrinə texniki baxışda islahatlar tələb edir

Bu gün Bakıda «dəyirmi masa» keçirilib və avtonəqliyyat vasitələrinə texniki baxış məsələsi müzakirə olunub. 

İctimai təşkilatların və maraqlı dövlət qurumlarının nümayəndələri bu fikrə gəliblər ki, texniki baxışda islahatlar və keyfiyyətin artırılması günün tələbidir. 

Sahibkarlığa və Bazar İqtisadiyyatına Yardım Fondunun direktoru Sabit Bağırov avtonəqliyyat vasitələrinin texniki baxış üzrə beynəlxalq təcrübədən danışıb. Onun sözlərinə görə, bir çox ölkələrdə buraxılışın ilk 2-3 ilində avtomobillər texniki baxışdan keçirilmir (Fransa, Almaniya, İspaniya və Rusiya). Sonrakı illərdə iki ildə bir dəfə baxış keçirilir. Onu əsasən özəl lisenziyalı şirkətlər və avtomobil dilerləri həyata keçirir. Rusiyada 2011-ci ildən polislə paralel özəl şirkətlər də texniki baxış keçirə bilərlər. 

“İqtisadi Təşəbbüslərə Yardım” İB sədri Azər Mehdiyev bildirib ki, zəruri avadanlıq olsa da, yol polisi texniki baxış keçirmir. «Texniki baxış adı ilə onlar pul yığır, halbuki texniki baxış sosial məsuliyyət tədbiridir». 

«Dəyirmi masa»da iştirak edənlərin çoxu bildirib ki, texniki baxış korrupsiya formalarındandır. Avtomobil sahiblərindən dövlət rüsumu və yol vergisindən 2-3 dəfə çox pul yığırlar. 

Konstitusiya Araşdırmaları Fondunun prezidenti Əliməmməd Nuriyev bildirib ki, bu, avtomobillərin texniki baxışından imtinaya əsas vermir. Beynəlxalq təcrübəyə əsaslanıb islahat aparmaq olar. 

Tədbirdə təklif edilib ki, ölkəyə daha təzə maşınlar gətirilməsi üçün gömrük rüsumları azaldılmalıdır. Gömrük rüsumu və vergisi yüksək olduğu üçün ölkəyə 10 ildən çox istifadədə olmuş avtomobillər gətirilir. 

“İqtisadi Təşəbbüslərə Yardım” İB-nin təşkil etdiyi tədbirdə ölkə başçısına müraciət qəbul edilib. 

2012-ci ilin əvvəli üçün ölkədə 1 mln-dan çox avtonəqliyyat vasitəsi olub. «Yol hərəkəti haqqında» qanuna əsasən, yeni avtomobillər buraxılışdan sonra ikinci ildə texniki baxışdan keçirilir. Qalan avtomobillər hər il baxışdan keçməlidir. --08C—