İki tikinti şirkəti investorlara təklif edilir

Əmlak Məsələləri Dövlət Komitəsi regionlardakı iki tikinti şirkətinin səhmlərini müsabiqə yolu ilə özəlləşdirməyə çıxarıb. Əvvəllər “Azərsutikinti” ASC-yə daxil olan müəssisələr bütünlüklə satılır.

“Cəlilabadsutikinti” ASC-nin səhmlərinin 99,99%-i, ”Ağcabədi Təmir Tikinti”nin səhmlərinin 100%-i satışa çıxarılır. Bunun üçün iddiaçılar 1 ay müddətinə investisiya proqramı təqdim etməlidir. Profili saxlamaq tələb edilmir.

SC-lərin səhmləri baha deyil:  “Cəlilabadsutikinti” 17 000 manata, ”Ağcabədi Təmir Tikinti” 24 000 manata təklif edilir.

ƏMDK-nin “Mülkiyyət” qəzetində investisiya müsabiqələrinin keçirilməsi barədə elan dərc edilib. «Dövlət əmlakının özəlləşdirilməsi haqqında» qanuna, həmçinin normativ aktlara (İkinci Dövlət Özəlləşmə Proqramı və İnvestisiya müsabiqələrinin keçirilməsi qaydaları) zidd olaraq müəssisələrin torpaq sahəsi və tikililəri barədə informasiya yoxdur. Bu informasiya ƏMDK-nin saytında da verilməyib. İddiaçılar bu informasiya ilə emissiya prospektində tanış ola bilərlər. O ƏMDK-nin inzibati binasındadır. Qurumun mətbuat xidmətinin rəhbəri Qulu Xəlilov Turan-a deyib ki, gələcəkdə bu informsiyalar qanunun tələb etdiyi kimi, qəzetdə verilə bilər.

Bu ilin I yarısında investisiya müsabiqəsi metodu ilə 4 SC-nin səhm paketi (“Azərsənayetikinti”, “Roza-çörək”, “Bakı-Çayçəkici” və “Zaqatala Tütün”) satılıb. 08D