İldə gömrük bəyanamələrinin doldurulmasından 35 mln manat gəlir əldə edilib

2015-ci ildə gömrük orqanlarına 219 min mal və avtonəqliyyat vasitələrinin idxal bəyannaməsi təqdim edilib. Bu, əvvəlki ildəkindən 8,4% çoxdur.

Gömrük bəyanamələrinin verilməsi pullu xidmətdir. Amma nə Gömrük Komitəsinin hüquqi sənədlərin məlumatı bazasında, nə də İqtisadiyyat Nazirliyinin “İcazələr” reyestrində bu ödənişin alınmasını əsaslandıran hüquqi sənəd yoxdur.

Turan-ın bu sualına DGK-nın 195-6 «qaynar xətt»ində cavab verməyiblər.

Dünən Dövlət Gömrük Komitəsi 27 yanvar 2016-cı il tarixdən mal və nəqliyyat vasitələrinin gömrük rəsmiləşdirilməsi üçün gömrük bəyannamələrinin tərtib edilməsinə görə xidmətlərə 70% güzəşt tətbiq edilməsi haqqında qərar qəbul edib. Bu səbəbdən gömrük bəyannamələrinin tərtib edilməsinə görə xidmət haqqı 50 AZN-ə (ƏDV daxil deyil) endirilib. Buna əsasən ehtimal etmək olar ki, təkcə 2015-ci ildə bu sənədlərin tərtibindən 35 mln manat gəlir əldə edilib. Əgər həmin ödəniş ixrac bəyannamələrinə də aid edilibsə (2015-ci ildə 42,6 ixrac bəyannaməsi doldurulub) bu məbləğ daha yüksək olmalıdır. Bu vəsait dövlət büdcəsinə daxil olmayıb, çünki DGK-nın rəsmi maliyyə hesabatlarında bu barədə məlumat yoxdur. Onun DGK daxilində necə bölündüyü məlum deyil.

İqtisadi Tədqiqatlar Mərkəzinin sədri Qalib Toğrul Turan-a bildirib ki, gömrük orqanının fəaliyyətində şəffaflıq səviyyəsi aşağıdır. «DGK Nazirlər Kabinetinin qərarına əsasən, gömrük rəsmiləşdirilməsinə görə 10 manatdan 275 manatadək rüsum alır. İldə nə qədər gəlir əldə edildiyi və bu vəsaitin hara xərcləndiyi məxfi saxlanılır», deyə Toğrul bildirib. 08B