İlham Əliyev: «İnflyasiya 1,1% olub, əhalinin gəlirləri 13,8% artıb»

Prezident İlham Əliyev ötən il Azərbaycanın inkişafını yüksək qiymətləndirib. 

Yanvarın 15-də hökumətin iclasında çıxış edən dövlət başçısı deyib ki, sənaye istehsalı (neft hasilatı da) 2,3% azalsa da, ÜDM artımı 2,2%, qeyri-neft sektorunda artım 9,7% olub. 

Cəmi 1,2% inflyasiya olub, pul gəlirləri 13,8% artıb. Bu, dünyada ən yüksək göstəricilərdəndir, deyə o qeyd edib. 

Onun sözlərinə görə, makroiqtisadi göstəricilərin artımı xeyli investisiya vəsaiti cəlb etmək imkanı verib - əgər 2011-ci ildə $20 mlrd vəsait qoyulmuşdusa, ötən il bu həcm $22 mlrd olub. Bunun $13 mlrd-ı dövlət sərmayəsidir. Yüksək beynəlxalq reytinqlər $9 mlrd xarici investisiya cəlb etməyə imkan verib. 

Davos iqtisadi forumunda Azərbaycan rəqabət qabiliyyətinə görə 46-cı, MDB-də birinci yerdə olub. Valyuta ehtiyatları $46 mlrd-a (ÜDM-in 70%-i) çatıb.

Sosial sahədən danışan prezident qeyd edib ki, ötən ilin ortalarından SSRİ Əmanət Bankında olan əmanətlər qaytarılmağa başlayıb. 

Ötən il 117 min yeni iş yeri açılıb. Onların 93 mini daimi iş yeridir. Proqramın əvvəlindən 1 milyon 200 min yeni iş yeri açılıb ki, bu da öz növbəsində işsizliyin böyük dərəcədə azaldılmasına xidmət göstərıb. İşsizliyin səviyyəsi 2012-ci ildə bir qədər aşağı düşüb və indi 5,2 faiz səviyyəsindədir. İşsizliklə bilavasitə bağlı olan yoxsulluğun səviyyəsi də aşağı düşüb - 7,6 faizdən 6 faizə. O, vəd verib ki, Azərbaycanda yoxsulluğu tamamilə aradan götürmək vəzifəsi də artıq təmin ediləcək.  

 Prezident İlham Əliyev qeyd edib ki, ötən il məcburi köçkünlərin vəziyyətinin yaxşılaşdırılması üçün Dövlət Neft Fondu 300 milyon manat vəsait ayırıb. Bu vəsaitin hesabına 20 mindən çox məcburi köçkün yeni mənzillərlə, evlərlə təmin edilib. Bu il də Dövlət Neft Fondunda eyni səviyyədə vəsait nəzərdə tutulub. Bu il də ən azı 20 min köçkün yeni evlərlə, mənzillərlə təmin ediləcək. 

TANAP layihəsindən danışan dövlət başçısı onu gələcək iqtisadi maraqların təmin edilməsi üçün mühüm iş adlandırıb. 

2013-cü il üçün perspektivlərdən danışan prezident büdcənin xərclər hissəsinin 20 mlrd manata artırılmasından danışıb (ÜDM-in 35,65%-i). Bunun 6 mlrd 915,2 mln manatı və ya 34,9% dövlət investisiya layihələrinə - yol tikintisi, meliorasiya, su kəməri çəkilişi, qaz və kanalizasiya xətləri, alternativ energetikaya yönəldiləcək. Yeni elektrik stansiyaları ölkəyə əlavə 1 min meqavatt elektrik enerjisi verəcək. 

Prioritet sahələrə bunlar aid edilib: paytaxt və regionların inkişafı, ərzaq proqramı, telekommunikasiya və informatika, avtomobil və kosmik sənaye, təbiəti mühafizə. "Elektron hökumət", maliyyə şəffaflığı və korrupsiya ilə mübarizənin başqa komponentlərindən də söz açılıb. 

Tədbirdə iqtisadi inkişaf, rabitə və informasiya texnologiyaları nazirləri, Qaçqınkomun sədri də çıxış edib.–17D—