Hüquq müdafiəçiləri siyasi məhbuslar siyahısını yeniləyiblər

"Azərbaycanda Siyasi Məhbusların Azadlığı Uğrunda" İttifaq 357 nəfərdən ibarət yenilənmiş siyasi məhbuslar siyahısını dərc edib. 12 dekabr 2024-cü il tarixli əvvəlki siyahı ilə müqayisədə siyasi məhbusların sayı 26 nəfər artıb.

Onlar arasında jurnalistlər Fərid İsmayılov, Şəmşad Ağa, Şahnaz Bəylərqızı və İmişlidə iğtişaşlar zamanı həbs edilmiş 13 nəfər və digərləri var.

Siyahıya daxil edilən şəxslər 12 qrupa təsnif edilib: "jurnalistlər və blogerlər" - 27 nəfər, "hüquq müdafiəçiləri" - 4 nəfər, "müxalif partiya və vətəndaş cəmiyyəti üzvləri" - 32 nəfər, "milli azlıqların fəalları" - 4 nəfər, "müharibə əleyhinə fəallar" - 2 nəfər, "Söyüdlü kəndinin işi üzrə" - 2 nəfər, "Almaniyadan deport olunmuş siyasi mühacirlər" - 5 nəfər, "İmişli işi üzrə həbs olunanlar" - 13 nəfər, "dindarlar" - 235 nəfər, "Tərtər işi üzrə həbs olunanlar" - 8 nəfər, "Gəncə işi üzrə həbs olunanlar" - 13 nəfər, "ömürlük həbs olunanlar" - 12 nəfər.

Siyahını Sülh və Demokratiya İnstitutunun direktoru Leyla Yunus və Siyasi Məhbuslar Monitorinq Mərkəzinin rəhbəri Elşən Həsənov tərtib ediblər.

Milli Məclisin İnsan hüquqları komitəsinin sədri Zahid Oruc Turan-a bildirib ki, bir qədər sonra Əfv Komissiyasının iclasları başlayacaq: "Bu da özü-özlüyündə artıq 30-cu ili tamam olan, xalq tərəfindən yüksək qiymətləndirilən və çox ağır dövrdə Ulu Öndər tərəfindən başlanan bu humanist addımın nəticə verdiyinin, cəmiyyətdə vətəndaş-dövlət münasibətlərinin inkişafının növbəti təzahürü prosesi olacaq".

Komitə sədrinin sözlərinə görə, bununla paralel müşahidə olunan başqa bir mövzu olub: "O da Donald Tramp hakimiyyətə gəlməklə USAID timsalında qlobal saxta Amerika qüvvələrinin necə öz mənafeləri və dünyanı idarə etmək silahları kimi bu məhbuslar mövzusundan yararlandığının şahidi olmuşuq".

Z.Oruc qeyd edib ki, qeyd olunan sayda şəxslər Azərbaycan qanunvericiliyi ilə müxtəlif məsuliyyətlərə ya cəlb olunublar, ya da hazırda istintaq altındadılar: "Lakin əksər hallarda bunlar o qüvvələrdir ki, bu və ya digər beynəlxalq layihələr çərçivəsində onlar Azərbaycan qanunvericiliyi ilə qeydiyyatdan keçməli və ən sonda hüquqi legitim bir müstəviyəyə gətirilməli idi. Bundan başqa, bu, qaçaqmalçılıq hadisəsidir, vergidən yayınmadır və s. O üzdən siyahını tərtib edən Leyla Yunus özü ötən on illər ərzində məhz həmin siyahılar hesabına özünü qrantverən qurumların nömrə 1 benefisiarı kimi hiss edib".

Deputat vurğulayıb ki, bu məsələdə Azərbaycan dövləti istənilən beynəlxalq qurumlarla dialoqlara hazırdır: "Yəni bu mövzu nəhayət bir tərəfdən hüquqi baxımdan olanlar çözülsün. Ortaya qoyulan iradə ondan ibarətdir ki, Azərbaycan qanunvericiliyi qrant layihələri proseslərində əldə əsas götürülsün. Amma media təmsilçilərinə gəldikdə, çox təəssüflər olsun ki, onlar bir sıra hallarda gerçək adları deyil, öz jurnalist adlarını kənara qoyub pərdəli bir mövzuları üzərindən müxtəlif xarici dairələrin hakimiyyət uğrunda mübarizəsinə xidmət edən layihələrində yer alıblar. Ona görə də işi siyasiləşdirmiş məhbuslar var, nəyinki siyasi məhbus".