İnternet camiəsi sosial yardım sahəsində maliyyə cinayəti aşkarlayıb

 Bu ilin I yarısında 12 rayonda sosial yardım verilməsində sui-istifadə halı aşkarlanıb. Əmək və Əhalinin Sosial Müdafiəsi Nazirliyinin (ƏƏSMN) məlumatına görə, 647 ailə əsassız olaraq aztəminatlı kareqoruyasına salınıb və onlara 710 min 310 manat xərclənib.

Söhbət 2 rayonda (Ağdam, Goranboy, İmişli, Saatlı, Masallı, Lerik, Cəlilabad, Biləsuvar, Sumqayıt, Oğuz, Xəzər, Daşkəsən rayonlarından gedir, deyə bu gün mətbuat konfransında ƏƏSMN yanında Dövlət Sosial Təminat Xidmətinin (DSTX) rəisi Çingiz Əliyev) bildirib. O deyib ki, ünvanlı sosial yardım təyinatında şəffaflığın və bu sahəyə ictimai nəzarətin təmin olunması məqsədilə bu yardımları alanların adlı siyahısı Nazirliyin internet səhifəsində (www.eesmn.gov.az, www.mlspp.gov.az) yerləşdirilib və qanunsuz şəkildə yardım təyin olunmuş ailələr barədə ƏƏSMN-ə məlumatlar verilməsi üçün KİV vasitəsilə əhaliyə müraciətlər olunub. Bu tədbir şəffaflığın təmin edilməsi işlərində vətəndaşların da iştirakına zəmin yaradıb.

Həmin ailələrə ünvanlı sosial yardımın ödənişi dayandırılaraq, qanunsuz ödənilmiş vəsaitin 344571,0 manatı və ya 48,5 faizi büdcəyə bərpa etdirilib. Beş rayonda (Ağdam, Goranboy, İmişli, Saatlı, Daşkəsən) ƏSMM-in müvafiq vəzifəli şəxsləri ilkin olaraq tutduqları vəzifədən azad olunub. Mərkəzlər üzrə müvafiq materiallar hüquqi qiymət verilməsi üçün Azərbaycan Respublikası Baş Prokurorluğuna göndərilib. --17D—