Baş Prokurorluq və MTN Rauf Mirqədirovun təqsirsizlik prezumpsiyasını pozublar

Rauf Mirqədirovun vəkilləri Azərbaycan  Baş Prokurorluğu və Milli Təhlükəsizlik Nazirliyinin mətbuat xidmətlərinin birgə məlumatının jurnalistin təqsirsizlik prezumpsiyası hüququnu kobud şəkildə pozması hesab edirlər.

Vəkillər Fuad Ağayevin və Elmar Süleymanovun bəyanatında deyilir:  “Avropa İnsan Hüquqları Məhkəməsi dəfələrlə Azərbaycana qarşı şikayətlər üzrə İnsan Hüquqları və Əsas Azadlıqların Müdafiəsi haqqında Konvensiyanın 6 (2) maddəsinin, yəni təqsirsizlik prezumpsiyası hüququnun pozulmasını müəyyən edib. Buna əsas ölkənin hüquq- mühafizə orqanlarının məhkəmə hökmü olmadan insanları müxtəlif cinayətlər törətməkdə təqsirli göstərən bəyanatlar verməklə, ictimaiyyəti yanıltma, işə gələcəkdə baxacaq məhkəmələrə isə nəticənin hansı şəkildə olacağına dair ismarıclar vermələri olub. Dəlil və sübutların vətəndaşların təqsirliliyini deyil, təqsirsizliyini təsdiq etməsini görən prokurorluq və başqa orqanlar öz səhvlərini etiraf etmək, aylarla, bəzən illərlə əsassız məhbus həyatı keçirən şəxsləri azad etdirərək onlardan üzr istəmək əvəzinə, tez-tez bu yola – insanı məhkəmədən öncə faktiki məhkum etmə yoluna üstünlük verirlər.

Adətən Avropa Məhkəməsinin bu kimi qərarları həmin məhkəmənin yurisdiksiyasını qəbul etmiş dövlətlərdə oxşar pozuntuların gələcəkdə baş verməsinin qarşısını alır. Əfsuslar olsun ki, bu, Azərbaycana aid deyil. Buna bariz misal kimi Azərbaycan  Baş Prokurorluğu və Milli Təhlükəsizlik Nazirliyinin Rauf Mirqədirovla bağlı dünən axşam yaydığı birgə məlumatı göstərmək olar. Rauf Mirqədirovu birmənalı olaraq ağır cinayət törətmiş şəxs kimi təqdim edən bəyanat müəllifləri əslində özlərini ifşa edib, müdafiə tərəfinin, şəxsən R.Mirqədirovun əvvəlcədən söylədiyi versiyanın həqiqiliyini təsbit ediblər. 

Baş Prokurorluq və Milli Təhlükəsizlik Nazirliyinin sözügedən birgə məlumatının R.Mirqədirovun hüquqlarını, o cümlədən təqsirsizlik prezumpsiyası hüququnu kobud şəkildə pozması və ictimaiyyəti yanıltma cəhdi, gələcəkdə işə baxmalı olan məhkəmələr üçün isə əmr səciyyəsi daşımasını nəzərə alaraq, adıçəkilən qurumların bu qanunsuz aksiyasına cavab kimi R.Mirqədirovun müdafiəçiləri aşağıdakıları bəyan edirlər:

1. Baş Prokurorluğun sübut kimi qələmə verdiyi diskləri “Samvel” adlı şəxsin verməsi, müdafiə tərəfinin o versiyasını təsdiq edir ki, bu, Ermənistan xüsusi xidmətlərinin məqsədyönlü əməliyyatı olub və Dağlıq Qarabaq, Azərbaycan – Ermənistan mövzusunda ölkəmizin maraqlarını layiqincə təsvir və təmsil edən R.Mirqədirovun jurnalist və politoloq fəaliyyətinin qarşısının alınmasına yönəlib. 

2. Sözügedən məlumata görə, Ermənistan xüsusi xidmətləri əvvəl R.Mirqədirovu ələ alıblar, sonra isə Azərbaycan hüquq- mühafizə orqanlarına məlumat göndərməklə qiymətli “məxfi əməkdaşı” sıradan çıxarıblar. Bu, R.Mirqədirovu komprometasiya (gözdən salma) əməliyyatı deyilsə, belə çıxır ki, Ermənistan xüsusi xidmətləri ölkəmizin müvafiq qurumları ilə sıx əməkdaşlıqdadır.

3. Rauf Mirqədirovun Tbilisidə Laura Baqdasaryan və adını xatırlamadağı (prokurorluğun isə Araik Şirvanyan kimi təqdim etdiyi) şəxslə görüşünə gəlincə, belə 5 il yarım bundan əvvəl bir görüş olub və R.Mirqədirov həmin görüşdə Ermənistan deyil, Qərbi Avropa institutlarından birinin Cənubi Qafqaz üzrə layihəsində iştiraka ilkin razılıq verib, bu barədə müqavilə imzalayıb. Prokurorluğun məntiqi ilə götürsək, bu nəticəyə gələrik ki, beynəlxalq qrant layihələri ilə bağlı hər hansı danışıqların aparılması yolverilməzdir və casusluq kimi qiymətləndirilə bilər. 

4. Məlumatda göstərilib ki, Azərbaycan xüsusi xidmət orqanları da Laura Baqdasaryanın rəhbərlik etdiyi “Region” Tədqiqat Mərkəzi 2008-ci ildən (!!!) başlayaraq çoxsaylı Azərbaycan vətəndaşlarını kəşfiyyat-pozuculuq fəaliyyətinə cəlb etmək məqsədi güdüb. Xüsusi xidmət orqanlarının ən mühüm vəzifələrindən biri düşmən dövlətlərin Azərbaycan ərazisindəki dağıdıcılıq fəaliyyətinin qarşısı alınma olduğu halda, bunu bilən müvafiq yerli orqanlar hansı səbəbdən indiyə kimi heç bir tədbir görməyib, insanları məlumatlandırmayıblar? 

5. ”Fridrix Nauman” Fondunun 2008-ci ildə Türkiyədə təşkil etdiyi konfransla bağlı da faktları təhrif edən məlumat müəlliflərinin onlarla şəxslə yanaşı David Şahnazaryanın konfransda iştirak etməsini Rauf Mirqədirovun qanunsuz fəaliyyəti kimi təqdim etmək gülüncdür. Rauf Mirqədirovun Dağlıq Qarabağ probleminin həlli perspektivləri ilə bağlı David Şahnazaryanın məhz hansı fikirləri ilə razılaşdığını bildirməyən prokurorluq unudur ki, D.Şahnazaryan hələ 20 il bundan əvvəl Ağdam, Qubadlı, Zəngilan, Kəlbəcər və s., yəni Dağlıq Qarabağ ərazisinə daxil olmayan rayonların azad edilməsinin tərəfdarı olub. 

6. O ki qaldı dövlət və hərbi sirr təşkil edən hərbi hissələrin, aerodrom və sair strateji əhəmiyyətli dövlət obyektlərinin yerlərinin təsvir olunduğu sxem, fotoşəkillərə, bu da həqiqətdən tamamilə uzaq bir iddiadır! R.Mirqədirovun sərəncamında nə hərbi peyklər, nə də AVAKS sistemi olmayıb. Qalan iddialar ilə bağlı R.Mirqədirovun məqalələrini oxumaq kifayətdir. O hər bir səfəri ilə bağlı geniş məqalələr yazaraq, təəssuratlarını oxucularla bölüşüb.

7. Beləliklə, adıçəkilən məlumatı hərfi başa düşsək, R.Mirqədirova münasibətdə Ermənistan və Azərbaycan hüquq- mühafizə orqanlarının mövqeyi üst-üstə düşür. Əslində isə R.Mirqədirovun həbsi və xüsusilə ağır cinayətdə təqsirləndirilməsi, onun region mediasından bu yolla uzaqlaşdırılması Ermənistan xüsusi xidmətlərinin uğurlu əməliyyatı kimi qiymətləndirilməlidir.  –06D-