Obamaya Azərbaycanla hərbi əməkdaşlığı gücləndirmək tövsiyə olunub

ABŞ Konqresi Rusiyanın təcavüzünün qarşısının alınması haqqında qanun layihəsini ikinci oxunuşda qəbul edib. Qanun layihəsinə əsasən Moldova, Ukrayna və Gürcüstan NATO üzvü olmadan ABŞ-ın müttəfiqi statusunu alacaqlar.

Layihə yekun oxunuşda qəbula hazırlanmaq üçün uyğun komissiyaya verilib. Ukraynanın Espreso TV məlumat yayıb.

Layihə ABŞ prezidentinə Amerikanın Ukrayna, Gürcüstan, Moldova, Azərbaycan, Bosniya və Herseqovina, Kosovo, Makedoniya, Çernoqoriya və Serbiya ilə hərbi əməkdaşlığın gücləndirilməsini, NATO-nun köməyilə  bu ölkələrin təhlükəsizliyinin təmin olunmasını tövsiyə edir.

Bundan əlavə, layihə ÜTT üzvlərinə təbii qaz ixracının təsdiqlənməsi prosedurunun tətbiqi məqsədilə qaz haqqında qanuna dəyişikliklərin edilməsini nəzərdə tutur  və ABŞ Beynəlxalq İnkişaf Agentliyini (USAİD) Ticarət və İnkişaf Agentliyini, Özəl Beynəlxalq İnvestsiyalar Korporasiyasını (OPIC) və Dünya Bankı Qrupunu təbii qaz-neft ehtiyatlarının istismarı və alternativ enerji mənbələrinin inkişafı üçün Ukrayna, Gürcüstan və Moldovaya yardım göstərilməsinin dəstəklənməsinə çağırır.

Sənəd Rusiyanın Krım üzərində suverenliyinin və ya Krımın qanusuz anneksiyasının dəstəklənməsini qadağan edir.

Bundan əlavə, ABŞ dövlət katibinə keçmiş SSRİ dövlətlərində demokratik institutlarınn, müstəqil KİV, siyasi və qeyri-hökumət təşkilatlarının möhkəmləndirilməsi, həmin dövlətlərlə təhsil və mədəni mübadilənin canlandırılması tövsiyə olunub.—0—