İran TANAP-da hissə almaq istəyir

İran Transanadolu qaz kəmərində (TANAP) hissə almaq istəyir. Bu barədə aprelin 4-də SOCAR prezidenti Rövnəq Abdullayev jurnalistlərə bildirib. Dövlət neft şirkətinin rəhbəri əlavə edib ki, SOCAR bu layihədə öz payının bir hissəsinin satışı haqqında təkliflərə baxmağa hazırdır.

“TANAP çox sərfəli layihədir. Buna görə başqa variantlara getmədən, yalnız öz payımızı sata bilərik. Sərfəli təklif olsa, onu müzakirə etməyə hazırıq”, deyə Abullayev bildirib.

Onun sözlərinə görə, artıq təkliflər daxil olub. “İrana qarşı sanksiyaların ləğvindən sonra TANAP-ın əhəmiyyəti xeyli artacaq. İran qaz hasilatı həcmini artıracaq, TANAP-dan başqa isə hələlik İran qazının beynəlxalq bazarlara çıxması üçün alternativ yoxdur”.

Xatırladaq ki, TANAP Azərbaycanın “Şahdəniz” yatağından çıxarılan qazın Gürcüstan və Türkiyə vasitəsilə Avropaya nəqli məqsədilə tikilir.

Birinci mərhələdə qaz kəmərinin gücü ildə 16 mlrd. kubmetr təşkil edəcək, növbəti mərhələdə bu göstərici 31 mlrd. kubmetrə qədər artacaq. Qazın böyük hissəsi Transadriatik qaz kəməri (TAP) vasitəsilə Avropaya, 6 mlrd. kubmetr isə Türkiyəyə gedəcək.

Hazırda TANAP-da 58% payı var, 2015-ci il martın 13-də səhmdarlar arasına 12% payla Britaniyanın BP şirkəti daxilolub, bir müddət əvvəl 30%-lik payı Türkiyənin “Botas” şirkəti alıb.

İran TANAP-a qoşularsa, Avropaya qaz nəqli həcmi dəfələrcə arta bilər. Bundan başqa, çoxlarının səmərəsiz olduğuna görə “dəfn etdiyi” Nabucco layihəsi fəallaşır. Türkmənistanın ehtimal olunan TANAP-a qoşulması ilə Avropanın qazla təmin edilməsi haqqında məsələ tamamilə bağlana bilər. -02D-