İyun ayinda imb-da qiymətlər sabit qalib

İyun ayında İlkin Mənzil Bazarında (İMB) ümumi aktivlik müşahidə edilsədə, qiymətlər əsasən sabit olaraq qalıb. Eyni vəziyyət  Respublikanın digər böyük şəhərlərində də müşahidə edilmişdir. "Əmlak Bazarı İştirakçıları" İctimai Birliyinin hesablamalarına görə hal-hazırda İMB-da orta qiymət indeksi 1 kv.metr üçün 873 manat civarında qərarlaşıb. Ötən rübün müvafiq dövrü ilə müqayisədə qiymət dəyişməsi 2,3%, ötən ilə nisbətdə isə 7,7% artımla yadda qalıb. 2008-ci ilin sentyabr ayı (böhran dövrü) ilə müqayisədə isə qiymət azalması 26,8% təşkil edib. Qeyd edək ki, həmin dövr üçün 1 kv.metr mənzilin qiyməti 1194 manat olub. Ay ərzində ən cəlb edici rayonlar Yasamal, Xəyai və Nəsimi rayonları оlmuşdur. Son bir ayda bazarda təklif olunan yeni tikililərin sayı 396, tikinti şirkətlərinin sayı isə-131 olub. İyun ayında əvvəlki aylarda olduğu kimi, yеni tikililərdə 3-оtaqlı mənzillər daha çох üstünlük təşkil еdib. 5-оtaqlı mənzillər əsasən şəhərin 1 zоnasının, 1-оtaqlı mənzillər isə daha çох 3-cü zоnanın payına düşüb. 1-otaqlı mənzillərin orta sahəsi 60,7 kv.m, 2 otaqlılarınkı 92,1 kv.m, 3-otaqlılarda 131,8 kv.m, 4-otaqlılarda 182,9, 5-otaqlılarda isə 238,3 kv. metr təşkil edib.

Ekspertlər son aylarda Təkrar Mənzil Bazarında olduğu kimi İlkin Mənzil Bazarındada aktivliyin artdığını vurğulayırlar. Bunu əsasən bazardakı ümumi tendensiyanın nəticəsi kimi görürlər. Mütəxəssislər hələdə, İMB-da satışa çıxarılan mənzillərin real qiymətləndirməni əks etdirmədiyini söyləyirlər. Eləcədə İMB-da sənədləşmə, kommunal xidmətlərin qənaətbaxş olmaması, ipoteka şərtlərinin əlverişsizliyi, süni qiymətləndirmə, inhisarçılıq və digər problemlərin də mövcudluğu bazardakı aktivliyə mənfi təsir göstərən əsas səbəblər kimi qeyd olunur. Mövsümlə əlaqədar olaraq yaxın günlərdə bazardakı aktivliyin nisbətən aşağı düşəcəyi, qiymətlərin isə əsasən sabit qalacağı proqnozlaşdırılır.