Kənd Təsərrüfatı Nazirliyi pambıq yığımı və emalı prosesini əlaqələndirir

Bakı/18.09.17/Turan: Azərbaycanda kütləvi pambıq yığımı davam edir. Bu il, keçmiş Sovet dövründə olduğu kimi, pambıq yığımı kampaniyası Kənd Təsərrüfatı Nazirliyindən əlaqləndirilir.

Ötən şənbə nazirlikdə rayonlarda Kənd Təsərrüfatı İdarələrinin rəislərinin və xammal pambıq tədarükü məntəqələrinin rəhbərlərinin iştirakı ilə müşavirə keçirilib. Pambıq istehsalına, tədarükünə və emanlına və qarşıda duran vəzifələrə həsr olunmuş müşavirəni nazir Heydər Əsədov özü keçirib.

Pambıq tədarükü məntəqələrində mövcud vəziyyət, qəbul olunmuş pambıq məhsulunun vəsaitinin pambıq istehsalçılarına vaxtında verilməsi, pambıq qəbulu zamanı uçot hesabat sənədlərinin tərtibatı qaydaları barədə hesabatlar dinlənilib. Qeyd edək ki, xammal pambığın istehsalı üzrə subsidiyalar tədarük məntəqələrinə satılmış həcmə uyğun olaraq verilir. Dövlət fermerlərə və kənd təsərrüfatı müəssisələrinə yığılmış pambığın hər kiloqramı üçün 0,10 manat ödəyir. Xammal pambığın alış qiyməti 0,40-0,50 manat/kq təşkil edir.

Bu il 136,4 min ha ərazidən pambıq yığılır. 2016-cı ildə pambıq sahələri 52,1 min ha təşkil edirdi. Büdcə vəsaiti hesabına bu il təxminən 150 pambıqyığan kombayn, habelə yüzlərlə başqa texnika alınıb. 08D