Maliyyə Bazarlarına Nəzarət Palatasının səlahiyyətləri barədə

Martın 10-da prezident İlham Əiyev Maliyyə Bazarlarına Nəzarət Palatasının (MBNP) nizamnaməsini təsdiqləyib.

Həmin gün Rüfət Aslanlı Palatanın publik hüquqi şəxsin Direktorlar Şurasının sədri təyin edilib.

Nizamnaməyə görə, MBNP-nin məqsədi mənfəət əldə etmək deyil. Bununla əlaqədar Vergi Məcəlləsinə əlavə edilib. Buna uyğun olaraq palata vergi ödəməkdən azad edilib.

MBNP-nin məqsədi maliyyə bazarlarının davamlılığının və effektiv fəaliyyətinin təminatı, kreditorların, sığortalanmış şəxslərin, investorların və maliyyə bazarlarının digər istehlakçılarının hüquqlarının müdafiəsidir.

Palata maliyyə bazarlarının iştirakçılarına lisenziya verir, yoxlamalar aparır, onlardan hesabatlar qəbul edir. Qurum həmçinin nəzarətində olan subyektlərin sağlamlaşdırılması barədə plan hazırlayır, onlar üçün korporativ standratları müəyyən edir.

Palatanın idarə edilməsi ilə Direktorlar Şurası və İdarə Heyəti məşğul olur. Bu qurumun üzvlərinə, palatanın başqa işçilərinə, həmçinin onların ailə üzvlərinə tələblərdən biri odur ki, onlar MBNP-nin nəzarətində olan subyektlərdə mühüm iştirak payına malik ola bilməz, hətta ictimai təşkilatlara üzv ola bilməz.

Palata dövlət başçısının birbaşa nəzarəti altındadır.

Palatanın Direktorlar Şurası 5 nəfərdən ibarətdir və onun fəaliyyətini yoxlayır. Onların hamısını dövlət başçısı 5 il müddətinə təyin edir. Palatanın baş icraçı direktoru da prezident tərəfindən beş il müddətinə təyin edilir. Direktorlar Şurası hər il martın 31-dək maliyyə bazarının vəziyyəti və inkişaf perspektivləri barədə hesabatı ölkə prezidentinə təqdim edir.

MBNP-nin nizamnamə kapitalı 5 mln. manat həcmində müəyyən edilib.-08B-