Müsabiqəyə 5390 hektar torpaq çıxarılıb

Fevralın 18-də ölkənin dörd rayonunda dövlət mülkiyyətində olan 5390 hektar torpağın uzun müddətli icarəyə verilməsi ilə bağlı müsabiqələr keçiriləcək. İddiaçıların qarşısına qoyulan əsas tələb aparıcı aqrotexniki texnologiyaların istifadə olunması ilə taxıl və toxumçuluq təsərrüfatlarının yarıdılmasıdır. 

Torpaq və Xəritəçəkmə Dövlət Komitəsindən Turana bildiriblər ki, müsabiqələr Hacıqabul, Cəlilabad və Beyləqan rayonlarının yerli icra hakimiyyətləri tərəfindən keçirilir. Torpaqlar 49 ildən az olmayan müddətə icarəyə verilir. Hacıqabul rayonunda 1626,6 hektar torpaq üçün illik icarə haqqının orta qiyməti 21 500 manat, Cəlilabad rayonunda 1300 hektar torpaq üçün - 13 000 manat, Beyləqan rayonunla 1200 və 1265 hektar üçün müvafiq olaraq 1000 və 14 100 manatdır.

Müsabiqənin şərtlərinə əsasən, onun iddiaçıları taxıl və toxumçuluq istehsalı sahəsində iş təcrübəsinə malik olmalı, yağış suvarılması sahəsində mütəxəssislərə malik olmalı, planlaşdırılan işlərin maliyyələşdirilməsi üçün maliyyə mənbələrinə malik olmalıdır. Onlar həmçinin müsabiqə komissiyasına təsərrüfat daxili yağış suvarılması sisteminin yaradılmasına, kollektor-drenaj şəbəkəsinin, yolların tikintisi, elektrik təminatının, həmçinin maddi-texniki bazanın və emal sahələrinin yaradılmasına dair investisiya proqramını təqdim etməlidir. Müsabiqə qalibləri fəaliyyətdə olan təsərrüfatların köçürülməsi ilə bağlı kompensasiyaların ödənilməsini öz üzərinə götürməlidir. 

Qeyd olunan rayonlarda iri taxıl və toxumçuluq təsərrüfatlarının yaradılması ilə bağlı sərəncam 2013-cü ildə Nazirlər Kabineti tərəfindən verilib. Hökumət həmçinin Xaçmaz rayonu ərazisində 523 hektar torpağın özəl heyvandarlıq təsərrüfatının yaradılmasına ayrılması ilə bağlı qərar qəbul edib. 

Maraqlıdır ki, fevralın 5-də regionların sosial-iqtisadi inkişafına dair dövlət proqramlarının reallaşdırılmasına həsr olunan konfransda iqtisadiyyat və sənaye naziri Şahin Mustafayev qeyd edib ki, yuxarıda qeyd olunan rayonlarda beş iri taxılçılıq, toxumçuluq və heyvandarlıq təsərrüfatlarının yaradılmasına dair işlər «başa çatmaq üzrədir». Bunun torpaq müsabiqələrinin formal xarakter daşıması anlamına gəlməsi isə məlum deyil.

2012-ci ildə hökumət Ağcəbədi və Beyləqan rayonlarında iri taxılçılıq təsərrüfatlarının yaradılması üçün 4800 hektar torpağın icarəyə verilməsi ilə bağlı ilk müsabiqələri keçirib. Bu torpaqlar «Səba» şirkətlər qrupunun idarəçiliyinə keçdi. 

Səmərəli əkinçiliyin həyata keçirilməsi üçün hökumət əsasən dövlət fondundan 203 min hektar torpaq müəyyən edib. Birinci mərhələdə bu məqsədlər üçün 57 min hektar torpağın istifadə olunması nəzərdə tutulub. 08B