Müstəqil auditdən yayınanları məhkəmə cərimələyəcək

Azərbaycan Auditorlar Palatası icbari müstəqil auditdən yayınanları aşkarlamaq və inzibati məsuliyyətə cəlb etmək üçün mexanizmlər hazırlayaraq baxılmaq üçün hökumətə verib. 

Müstəqil auditdən yayınanların  məsuliyyətə cəlb edilməsi barədə İnzibati Xətalar Məcəlləsinə əlavələr 13 aprel 2011-ci ildə qüvvəyə minib. Amma bu tələbi pozan subyektlərdən heç biri məsuliyyətə cəlb edilməyib. İl yarımdır ki, cərimə sanksiyalarının tətbiqi mexanizmi barədə hökumət daxilində yazışmalar gedir. 

Auditorlar Palatası təklif edir ki, Vergilər Nazirliyi və Palatanın üzərinə ilin sonuna kimi müstəqil auditdən keçməli olan təşkilatların siyahısını hazırlamaq tapşırılsın. Növbəti mərhələdə Palata maliyyə hesabatı üzrə (konsolidə edilmiş maliyyə hesabatı hazırlayan təşkilatlar üçün 30 iyun, başqa kommersiya və digər təşkilatlar üçün 30 aprel) və vergi hesabatı üzrə (1 aprel) son müddətdə auditdən yayınanları müəyyən edir. Qanuna görə, maliyyə hesabatlarına audit rəyi əlavə edilməlidir. 

Auditorlar Palatasında Turan-a deyiblər ki, müstəqil auditdən yayınanları şəhər (rayon) məhkəmələri Palatanın təqdimatı ilə məsuliyyətə cəlb etməlidir. 

Xatırladaq ki, banklar və sığorta şirkətləri, səhmdar cəmiyyətləri və məhdud məsuliyyətli səhmdar cəmiyyətləri, holdinqlər və maliyyə-sənaye qrupları təbii inhisar subyektləri, fondlar, qeyri-hökumət təşkilatları, bələdiyyələr və s. müstəqil auditdən keçməlidir. 

Müstəqil auditdən yayınmağa görə cərimə vəzifəli şəxslər üçün 300-600 manat, hüquqi şəxslər üçün 1500-2500 manatdır. Auditorlar Palatasının məlumatına görə, müstəqil auditdən keçmə səviyyəsi ölkədə 15%-dən çox deyil. 08B