«Nabucco West» ilə «Тар» tipində saziş imzalanacaq

Nabucco West layihəsi Azərbaycan qazının Avropa bazarına qaz tədarükü üzrə başqa layihələrlə rəqabəti davam etdirir, deyə Reuters ARDNŞ-nin Almaniya təmsilçisi Elmar Məmmədova istinadən bildirir. 

Məmmədovun sözlərinə görə, bu yaxınlarda “Şahdəniz” üzrə tərəfdaşlarla (BP, ARDNŞ və Total) “Transadriatik boru kəməri” (ТАР) konsorsiumu arasında ТАР-ın maliyyələşməsi üzrə saziş imzalanması Nabucco West-ə qarşı deyil.

"ТАР-la saziş tərəfdaşlara daha çox hüquqi təhlükəsizlik vəd edir. Bu qərar Nabucco West-ə qarşı deyil", - deyə Məmmədov bildirib və əlavə edib ki, ARDNŞ Nabucco West ilə də belə saziş imzalayacaq. 

Avqustun əvvəlində BP, ARDNŞ və Total TAP-la Azərbaycan qazının Avropa bazarına ixracı marşrutu seçilənə kimi maliyyələşməsi barədə qərar qəbul edib. Sazişə əsasən, vəsait layihə çərçivəsində müxtəlif işlərə yönəldiləcək. Bu işlər 2013-cü ildə Azərbaycan qazının Avropa bazarına ixracı marşrutu seçimi üzrə qərar qəbul edilənə kimi həyata keçirilməlidir.  

Saziş həmçinin “Şahdəniz” üzrə tərəfdaşların TAP-da 50% pay əldə etmək imkanını nəzərdə tutur. --0--