Nabucco-west iştirakçıları ideyalara qapılıb texniki-maliyyə məsələlərini unudurlar

Avstriyanın OMV konserninin rəhbəri Gerhard Roys Nabucco-West-də pay alacaqlarını gözləyir. Bu barədə 27 iyulda Dow Jones Newswires Der Standard qəzetinə istinad edərək bildirib.

"Tədarükçülərin ”Nabukko”da pay əldə edəcəyini düşünürəm, - deyə Roys qəzetə müsahibəsində bildirib. 

O, əlavə edib ki, “Şahdəniz” üzrə konsorsium layihədə iştirak arzusu ifadə edib və dəvət alıb. 

OMV Nabucco-West layihəsinin səhmdarlarındandır. Layihə 1300 km boru kəmərinin çəkilməsini nəzərdə tutur (Bolqarıstan 412 km, Rumıniya 469 km, Macarıstan 384 km, Avstriya 47 km).

“Şahdəniz” işlənməsinin ikinci mərhələsinə layihə üçün əsas mənbə kimi baxılır. Qalan səhmdarlar Macarıstandan FGSZ, Bolqarıstandan Bulgargaz, Rumıniyadan Transgaz, Türkiyədən Botas, Almaniyadan RWE-dir.

Əvvəllər Nabucco Gas Pipeline International GmbH mətbuat katibi Kristian Dolezal bəyan etmişdi ki, Nabucco-West bütün səhmdarlar, o cümlədən qaz istehsalçıları üçün açıqdır. "Biz “Şahdəniz” üzrə tərəfdaşlarda maraq gördük və bunu müsbət qiymətləndiririk", - deyə o bildirib. 

Azərbaycan Neft Araşdırmaları Mərkəzində Turan-a deyiblər ki, "əgər Nabucco-West iştirakçıları layihədə səhm paylarından qurtulmaq istəyirlərsə, demək, onların qaz kəmərini maliyyələşdirməkdə problemləri var". Bu, bir ay öncə “Şahdəniz” iştirakçıları Nabucco-West-i əsas marşrut kimi seçəndən sonra baş verir! Digər tərəfdən, Nabucco-West-də pay almaq “Şahdəniz” iştirakçılarına kommersiya cəhətdən nə verəcək? Axı BP-Azerbaijan prezidenti Rəşid Cavanşir Caspian Oil & Gas-2012 konfransında çıxışı zamanı bildirib ki, “Şahdəniz 2” üzrə ümumi xərclər və Xəzərdən Avropaya qədər infrastruktur xərcləri azı $45 mlrd olacaq. 

"Aydındır ki, ARDNŞ, TPAO və mümkündür ki, tezliklə BP, Statoil və Total da TANAP-a qoşulacaq. Bu isə əlavə milyardlarla xərcdir. Xarici şirkətlər bu qədər xərci nəyə çəkir, axı layihənin müddəti 2036-cı ilin oktyabrında bitir", - deyə Mərkəzdə qeyd ediblər. 

Mərkəzin analitikləri hesab edirlər ki, Nabucco-West iştirakçılarının davranışı bu qədər azaldılan layihdə də "qaranlıq məqamlar" qaldığını göstərir. Və iştirakçıların özlərində qaz kəmərini necə bitirmək barədə aydın təsəvvür yoxdur. Məsələn, bu yaxınlarda Nabucco-West təmsilçilərindən biri bu layihəni TANAP-la birləşdirməyi təklif edib?! "Belə qəribə ideya hardan yaranıb, axı onlar birləşdirilsə, Nabucco alınacaq. O isə yoxdur və orta perspektivdə də çətin ki olsun! Yəni Nabucco-West-də yenidən ideyalara qapılıb texniki-maliyyə məsələlərini unudurlar", - deyə Mərkəzdə qeyd ediblər. --12А—