Növbəti beynəlxalq sığorta forumunun vaxtı məlum oldu

23-24 iyunda Bakıda VII Azərbaycan Beynəlxalq Sığorta Forumu (AIIF-2016) keçiriləcək.

Azərbaycan Sığortaçılar Assosiasiyasının (ASA) məlumatına görə, o, 2 günlük tədbirə təşkilati, Maliyyə Bazarlarına Nəzarət Palatası maddi dəstək göstərəcək. Tədbirdə 20 ölkədən 200-dən çox şirkət və təşkilatın nümayəndələri iştirak edəcəklər.

Forumda Azərbaycan və regionun sığorta bazarı üçün aktual mövzular – nəzarət mexanizmləri, Azərbaycan sığorta bazarının yeni reallıqları, regionda makroiqtisadi tendensiyalar və onların sığorta bazarına təsiri, hazırkı mühitdə sığorta bazarının inkişafı üzrə prioritet istiqamətlər və yeni nəzarət üsulları və s mövzulara toxunulacaq.

Eləcə də sığorta tənzimlənməsində və nəzarətində yeni yanaşmalar, təkrarsığorta, təkrarsığortanın sığorta şirkətlərinin maliyyə stabilliyində rolu kimi mövzular üzrə müzakirələr aparılacaq.

Sığorta forumunda kənd təsərrüfatı sığortası, bu sahədə beynəlxalq təcrübə və modellər, risklərin adekvat qiymətləndirilməsi və risklərin əhatə olunması üçün əsas həllər, regionlar üzrə kənd təsərrüfat sığortası modelləri, bu sahənin dövlət tərəfindən tənzimlənməsi kimi məsələlər diqqət mərkəzində olacaq.

Tədbirdə avtomobil sığortası, bu sahədə zərərlərin qiymətləndirilməsi üzrə tariflər və sistemlər, proseslərin elektronlaşdırılması, yeni satış kanalları ilə bağlı müzakirələr olacaq.

"AİİF-2016"-da yeni sığorta məhsullarının yaradılması, həyat sığortası, bank sığortası, bu sahədə banklarla əməkdaşlıq, paket sığorta məhsullarının inkişafı və bununla əlaqədar mövzular üzrə müzakirələr, təqdimatlar və çıxışlar nəzərdə tutulur. . --17D—