Otellərin mənfəəti 34 mln manat olub

2014-cü ildə otellərin və qonaq evlərinin gəlirləri 5,7% artaraq 181 mln manat olub. Xərclər (147,1 mln manat) 1,1% artıb, 33,9 mln manat mənfəət əldə edilib. Gəlirlərin artımında xidmətin bahalanması da rol oynayıb: Dövlətstatkoma görə, ötən il xidmət haqları 2,2% bahalanıb.

Xərclərin çoxu əmək haqları və sosial ayırmaların (31,3% və 7,2%), malı alınması və yemək və içki hazırlanması (16%), amortizasiya ayırmalarının (8,9%) payına düşüb. Bu sektorda 9 min nəfər  (+750 nəfər) çalışır, orta maaş 425,6 manatdır. 

Dövlətstatkoma görə, 2014-cü ildə otellərə yerləşdirmə ilə bağlı 672,3 min nəfər müraciət edib. Bu, əvvəlki ildəkindən 0,9% çoxdur. Müraciətlərin 58,4%-i əcnəbilərin (392,8 min nəfər) payına düşür. Bunlar əsasən Britaniya, RF, Türkiyə, ABŞ, Almaniya, İran, İtaliya və s vətəndaşlarıdır. Ötən il gələn turistlərin 73,2%-i otel xidmətindən istifadə edib.

Otellərdə gecələmə sayı 1 687,7 min adam /gün təşkil edib. Bu, 2013-cü ildəkindən 0,8% çoxdur. Bunun 64,1%-i Bakının payına düşür. Azərbaycan otellərinin ümumi yüklülüyü 13% təşkil edib. Başqa sözlə, il ərzində otellər boş qalır. Ancaq ölkənin ayrı-ayrı regionlarına dair (məsələn, Şəki-Zaqatala rayonu) məlumatların təhlili göstərir ki, məmur oliqarxlara məxsus bir çox otellər qonaqların qəbulu və gəlirlərlə bağlı real məlumatları gizlədir. Hər il Qəbələ rayonunda yüzlərlə əcnəbilərin iştirak etdiyin çoxsaylı mədəni və humanitar tədbirlər keçirilir.

Ancaq bu rayonun qeyri-rəsmi olaraq fövqəlaqə hallar nazirinin ailəsinin nəzarət etdiyi mehmanxanalarının hesabatlarında bu göstəricilər əks olunmur.

Bu ilin yanvarın 1-ə olan vəziyyətə Azərbaycanda 17 363 (+4,9%) nömrənin olduğu 535 mehmanxana və mehmanxana tipli obyekt var. Onların təxminən 70%-i Bakıda yerləşir. Bu mehmanxanalar eyni vaxtda 35 652 adam qəbul edə bilir. 08D