Ötən il kassa xərcləri və mədaxil mütənasib olaraq artıb

2012-ci ilin yanvar-dekabrında bankların kassalarına ümumi nağd vəsait mədaxili 32,412 mlrd manat olub. Bu, əvvəlki ilin müvafiq dövrü ilə müqayisədə 30% çoxdur. Daha çox payı xarici valyuta satışı təmin edib – 33%. Mal satışı 16,4%, kreditlər üzrə mədaxil 8,1%, bankomatlar vasitəsilə mədaxil 4,8%, xidmət və işə görə  mədaxil 4,1%, əmlak alınan zaman notarial hesablara mədaxil 3,8%, depozit hesablarına mədaxil 4% və s. paya malik olub. Azərbaycan Mərkəzi Bankının məlumatına görə, kassa dövriyyəsinin kəsiri 2128 mln manat (dekabrda + 1174 mln manat) təşkil edib. Nağd pul xərcləri 12 ayda 34,541 mlrd manat olub. Bu, 2011-ci ilin eyni dövründəkindən 29,3% çoxdur. Ümumi xərclərdən 29,7% mal və xidmət xərcləri, 26% bankomatların pulla təchizatı ilə bağlı xərclər, 10,3% xarici valyuta alışı xərcləri, 5,9% kreditlər üzrə ödəniş, 4,6% əmlak əqdləri üzrə notarial hesablardan xərclər, 3,2% depozit hesabından ödənişlər və s. olub. 

  Hesabat dövründə nağd pul emissiyası 2119 mln manat olub. Bu, həmin dövrdəki nağd vəsait xərclərinin 6,1%-dir. 

   Günlük nağd pul mədaxilinin orta həcmi 88,557 mln manat, xərclərin orta həcmi 94,373 mln manat olub. --15B--