Hilal Məmmədovun işi üzrə prosesdə əsas şahidin ifadələri dinlənilib

Bu gün Bakıda Ağır Cinayətlərə dair İşlər üzrə Məhkəmədə “Tolışi sədo” qəzetinin baş redaktoru Hilal Məmmədovun işi üzrə məhkəmə prosesi davam edib. İclas əvvəlkilər kimi qapalı rejimdə keçirilib.

Vəkil Xalid Bağırovun Turan-a verdiyi məlumata görə, bugünki iclasda H.Məmmədova qarşı əsas şahid Elman Quliyev dindirilib.

Bu şəxs “Tolışi sədo” qəzetinin əvvəlki baş redaktoru Novruzəli Məmmədovun işi üzrə keçirdi və onunla birlikdə 6 il müddətinə azadlıqdan məhrum edilmişdi. Cəzasını tam çəkərək, yenicə azadlığa çıxıb. Hələ həbsxanadaykən, 2012-ci ilin iyununda o, H.Məmmədova qarşı ifadə verib. Maraqlıdır ki, N.Məmmədovun işi üzrə prosesdə Quliyev H.Məmmədovu tanımadığını iddia edib.

İndi isə o, H.Məmmədovun qanunsuz əməlləri haqqında N.Məmmədovdan öyrəndiyini iddia etməyə başlayıb. Bundan başqa, Quliyev bildirib ki, 2006-cı ildə 5 saat ərzində H.Məmmədovla söhbət edib və guya o, dövlət əleyhinə fəaliyyətdə iştiraka təşviq edib. Bu zaman E.Quliyev H.Məmmədovla görüşünün iki şahidinin – şair Əli Naser və Ataxan Əbilovun adını çəkib.

Lakin vəkil qeyd edib ki, nə Naser, nə də hazırda Hollandiyada mühacirətdə olan Əbilov Quliyevin sözlərini təsdiq etmir.

H.Məmmədov özü Quliyevin ifadələrini psixi cəhətdən qeyri-sağlam insanın iddiaları adlandırıb.

Növbəti məhkəmə iclası martın 13-də keçiriləcək.

Xatırladaq ki, 21 iyun 2012-ci ildə həbs edilmiş Hilal Məmmədov üç maddə ilə - dövlətə xəyanətdə, qanunsuz narkotik saxlamaqda və millətlərarası ayrı-seçkilik salmaqda ittiham olunur. Lakin beynəlxalq ictimaiyyət və yerli hüquq müdafiəçiləri onu vicdan məhbusu sayır. Saxta dövlətə xəyanət ittihamlarını bəhanə edərək, hakimiyyət prosesi qapalı keçirir. -06B-